Read Pohnpeian Sohp 14 Bible Online

Sohp 14 - Pohnpeian bible

Sohp 14

¹Kitail koaros ipwidi luwet. Aramas koaros ahneki soangen mourteieu me mwotomwot oh diren apwal

²Kitail kin keirda oh mengidi, rasehng wahnrohs kan; kitail kin sohrala duwehte mwete.

³Maing Koht, ia duwe, komw pahn ketin kupwukupwure ie, de malipeiewohng rehmwi pwe I en pakadeikda?

⁴Sohte mehkot mwakelekel kak kohsang ni mehkot samin duwehte aramas.

⁵Reireien ahnsoun eh mour kin kileldier mwohn eh pahn imwisekla-% sounpwong depe e pahn momourki. Komw ketin kileledier, oh sohte me pahn wekidala.

⁶Komw ketin sohpeiweisang pwe en kelehpwla, oh mweidohng en pereperenki eh mour apwal, ma e kak.

⁷Mie koapworopwor nin tuhke pwoat me paldier, e kak pwurehng mourda oh wosada.

⁸Mehnda ma kalewe kan mahlahr, oh paliweren tuhkeo mwoasoangotalahr nanpwel,

⁹pihl kak kawosehda pwe en wiahla tuhke kapw pwoat.

¹⁰Ahpw aramas emen kin mehla, oh iei met imwilahn mehkoaros reh; e kin mehla, oh ia ih met?

¹¹Ahnsou ehu pahn kohdo me pillap akan pahn tokedihsang pwilipwiliwei, oh pilen madau kan pahn pil madada,

¹²ahpw me melahr akan sohte pahn mourda. Re soh mwahn pahn pwourda nindokon lahng eh pahn mihmiehte; re soh mwahn pahn pirida sang ar meir.

¹³I ahpw men komwi en ketin nekidiehla nan sapwen me melahr akan; komw ketin karirihiehla, omwi engieng lao tokedi, komwi ahpw ketin kilelehdi ahnsou me komwi pahn ketin taman ie.

¹⁴Ma aramas emen pahn mehla, e kak pwurehng mourda? Ahpw I pahn awiawihete ahnsou mwahu sang met, oh kasikasik ahnsou apwal wet lao sohrala.

¹⁵Eri, ahnsowo, komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limwomwiet.

¹⁶Ahnsowo komw pahn ketin mwasamwasahn kahk koaros en ei mour, ahpw komw sohte pahn ketin kupwukupwure dipei kan.

¹⁷Komw pahn ketin mahkikihong ie dipei kan oh ketin kasohrehla; komw pahn ketin irisala sapwung koaros me I wiadahr.

¹⁸Ahnsou ehu pahn kohdo me nahna kan pahn pwupwudi oh paipalap akan pahn tohrek sang ar wasa kan.

¹⁹Pihl kan pahn koupwoarepeseng paip akan, oh keteu mosul kan pahn kangasang pwelen sahpw akan; ih duwen omwi kin ketin kasohrehla en aramas ar koapworopwor ong mour.

²⁰Komw kin ketin powehdi aramas oh kadarala kohkohlahte; mese kin mwomwsuwedla ni eh kin mehla.

²¹Nah seri kan kin ale wahu, ahpw e sohte mwahn kin ese; re kin paisuwedla, a sohte me kin ndahng.

²²Ihte me e kin pehm, medek en paliwereo, oh nsensuwed en nan kapehde.