Read Pohnpeian Sohp 17 Bible Online

Sohp 17 - Pohnpeian bible

Sohp 17

¹Imwin ei mour kerendohr, I solahr kak esingek; solahr ahi mehkot me luhwe, ihte nan sousou.

²I kin kilang duwen aramas koaros ar kin kapailokei ie.

³Maing Koht, I kin mehlel. Komwi ketin kupwurehla ei pato. Sohte emen me utung dahme I patohwan.

⁴Komwi ketin karotongelahr arail lamalam akan pwe re en dehr rong mehkan me mie katepe; komwi dehr ketin mweidohng re en pereperenki ar poweiehdi.

⁵Nan lepin padahk en mahs ako aramas emen pangalahr kompoakepah kan pwehn ale pweipweiki, oh nah seri kan ahpw alehki lokolok.

⁶Oh met aramas akan kin doadoahngki lepin padahk pwukat pwe re en uhkihong ie; re kin kohdo oh kandipih meseiet.

⁷I kereniongehr maskunkihla ei nsensuwed; pehi oh nehi kat ahtikitiklahr rasehng mwetehn paliweren aramas.

⁸Irail kan me kasik me irail me pwung pwuriamweikihla, oh irail koaros kadeikiehda me dene sohte ei Koht.

⁹Irail kan me kasik me dene re me wahu kin kamehlele me irail me pwung.

¹⁰Ahpw ma irail koaros kohdo oh uh mwohi, sohte emen rehrail me I pahn diar me loalokong.

¹¹Ei rahn akan imwiseklahr; ei koasoandi kan ohlahr; ei koapworopwor sohralahr.

¹²Ahpw kompoakepahi kan kin nda me nipwong iei nin rahn; re kin nda me marain kerendohr, ahpw I ese me I mihmihte nan rotorot.

¹³Ihte ei koapworopwor sapwen me melahr akan, wasa me I pahn wendi meirla nan rotorot.

¹⁴I pahn wiahkihla semei ei sousou, oh mwahs akan me pahn kangiehla I pahn wiahkihla inei oh riei serepein.

¹⁵Mie ehu koapworopwor ong ie? Ihs me kilangadahr ehu?

¹⁶Sohte koapworopwor pahn iang ie ni ei pahn kohdilahng nan sapwen me melahr akan.