Read Pohnpeian Sohp 24 Bible Online

Sohp 24 - Pohnpeian bible

Sohp 24

¹Dahme Koht sohte ketin koasoanehdihki ehu ahnsoun kopwung, ehu rahn en kopwung ong irail kan me kin papah?

²Aramas akan kin kamwakid arail pehs kan pwe re en kalaudehla sapwarail; re kin pirapahda sihpw kan oh kesehlong mpen neirail pelinmen kan.

³Re kin kihsang nein me sepwoupwou kan ahs akan, oh kin kolokol nein liohdi kou lao liohdio pwainla eh pweipwand kan.

⁴Re kin katokihedi en me semwehmwe kan ar pwung, oh idingohng me paisuwed kan en tang oh rukula.

⁵Eri me semwehmwe kan, duwehla ahs akan, me kin raparapahki kisin mwenge nan sapwtehn madekeng kan; solahr wasa re kak diar ie kenen neirail seri kan mwenge.

⁶Re kin koadoahkih mwaht akan me kaidehn arail, oh rikirik kreip nan en aramas suwed mwetin wain kan.

⁷Re kin meirla nipwong sohte upuhp, sohte mehkot me re kak perehkihsang irail lemwulemwur.

⁸Re kin wusekesengkihla keteu sang pohn nahna kan, re ahpw kin rukula oh kospene pahn paip akan.

⁹Aramas suwed kan kin kaliduwih seri sepwoupwou kan oh kihsang nein aramas semwehmwe kan seri pwehn kapwungkihla pweipwand.

¹⁰Ahpw me semwehmwe kan kin kohkohseli sohte likou mehn pere irail; re kin duhpekla ni ar kin dundolung wahn pilawa.

¹¹Re kin tiak wahn olip wiahkihda leh, oh kreip wiahkihda wain, ahpw pein irail kin men nimpilda.

¹²Nan kahnimw kan me soahn oh me pahn melahr akan kin wie weriwer, ahpw Koht kin ketin pohnsehse arail kapakap akan.

¹³Mie aramas me kin soikala marain; re sohte wehwehki oh sohte men kohla wasa me maraino pahn kahluwairaillahng ie.

¹⁴Sounkam aramas kin pwourda ninsohrahn oh kohieila kemehla me semwehmwe kan, oh nipwong eh kin pirap.

¹⁵Me kin kamwahl akan kin awiawih rotorot en pwohng en leledo; e kin ekihla mese pwe emen en dehr kilang.

¹⁶Sounpirap akan kin wahdpeseng ihmw akan nipwong, ahpw ni eh kin rahnpeseng re kin rukusang marain.

¹⁷Re kin masak marain en rahn, ahpw re sohte kin masak rotorot. Sopahr

¹⁸Lapake kin kapeila aramas suwed, oh sapwe kin mihla pahn sapwellimen Koht keria; e solahr kin kohla doadoahk nan eh mwetin wain kan.

¹⁹Nin duwen sinoh eh kin sohrala pahn ketipin oh karakar, iei duwen me dipan emen eh kin sohrasang nan sapwen me momour kan.

²⁰Ine pil kin sohla tamataman ih met; mwahs kin kangala oh kauwehla duwehte tuhke me pwupwudier.

²¹Met pweidahr pwehki eh wiakauwe liohdi kan oh sohte kesempwalki lih depwen kan.

²²Koht, nan sapwellime roson, kin ketin kamwomwala me lapalap akan; Koht kin ketin mwekid-oh aramas suwed akan kin mehla.

²³Mweinele Koht pahn kak ketin mweidohng en nsenamwahu, ahpw e kin ketin mwasamwasahn ahnsou koaros.

²⁴Aramas suwed men kin paiamwahu ahnsou kis, ahpw mwuhr e kin mengila rasehng dihpw, rasehng kohn pwoat me lupdier.

²⁵Mie emen me kak kamahmkihla me met sohte mehlel? Mie me kak kadehdehda me ei lokaia kan sohte mehlel?