Read Pohnpeian Sohp 29 Bible Online

Sohp 29 - Pohnpeian bible

Sohp 29

¹Sohp pwurehng tapihada koasoi Sohp

²I ahpw men ei mour en pwuralahng mahs, ni ahnsou me Koht kin ketin sinsile ie.

³Koht ketiket rehi ahnsowo oh ketikihong ie marain ni ei weweidwei nan rotorot.

⁴Iei ni rahn pwuko me I paiamwahu oh kalahngan en Koht sinsile imwei.

⁵Koht Wasa Lapalahpie ketin ieiang ie ahnsowo oh ei tungoal seri kan kapikapil ie.

⁶Ei tungoal kou oh kuht kan kihda milik laud, oh ei tuhkehn olip kan wosada wasa takain kan.

⁷Ni ahnsou me mah kan kin tuhpene nan kahnimwo, oh I kin mwohndiong nanpwungarail,

⁸mwahnakapw akan kin keisang mwohi ni ar kin kilang ie, oh me mah kan kin kasalehda ar waunekin ie.

⁹Kaunen aramas ako pahn kin tokedihsang ar koasoi;

¹⁰pil me keieu lapalap ako kin nennenla.

¹¹Koaros me kilang oh rong duwen ngehi kin koasoakoasoia duwen mwahu kan me I wiadahr.

¹²Ni ahnsou me semwehmwe kan peki sawas, I sewese irail; I sewese me sepwoupwou kan me sohte sawasaparail.

¹³Aramas akan me mihla nan apwal mwuledek, kapinga ie, oh I rapahkihong liohdi kan sawasaparail.

¹⁴I wia mwekid pwung oh pahrek ahnsou koaros.

¹⁵Ngehi me wia mesen me maskun kan, oh nehn me nehtuk kan.

¹⁶I rasehng sahm emen rehn me semwehmwe kan oh uhpalihki mehn liki kan me milahr nan apwal.

¹⁷I kauwehla manaman en aramas lemei kan oh doarehla me re kahpwalihalahr kan.

¹⁸I kasik me ei mour pahn reirei oh I pahn mehla nan imwei ni nsenamwahu.

¹⁹I rasehng tuhke pwoat me kalowe kan kin kelemwur ahnsou koaros, oh pwoaik kin kalamwur rah kan.

²⁰Aramas koaros kin kapikapinga ie ahnsou koaros, oh ei kehl sohte kin ohla.

²¹Ni ei kihda kaweid, aramas akan kin nennenla oh rong mwahu dahme I patohwanda;

²²re sohte kin kapatahiong mehkot ni ei kin kaimwisekala ei pato kan. Ei pato kan kin lel irail rasehng dingiding en keteu;

²³koaros kin pwungki ei pato kan rasehng soumwet kan ar kin perenda ahnsoun keteu.

²⁴I kin sirei ong irail ni eh kin sohla ar koapworopwor; ei mesen nsenamwahu kin kakehlahda kapehdirail.

²⁵I kin ale pwukoa oh koasoanehdi wie lamalam akan; I kahluwa irail rasehng nanmwarki men me kin kahluwa sapwellime sounpei kan, oh kansenamwawihirailla nan ar pwunod.