Read Pohnpeian Sohp 30 Bible Online

Sohp 30 - Pohnpeian bible

Sohp 30

¹Ahpw me pwulopwul sang ie kan kouruhr kin ie met! Arail pahpa ko ohl soh katepe kei; ihme I sohte kak mweidikihong re en iang nei kidi kan sile nei sihpw kan.

²Irail pwihn sakanakan oh soh katepe kei, inenen luwet en iang wia ei doadoahk.

³Re inenen semwehmwe oh kin men mwenge; re pil kak kangada kalowen tuhke meng-% nipwong, nan sapwtehn, nan sahpw me sohte mehkot loale.

⁴Re usada dipwen nan sapwtehn oh kang, re pil kang kalowen tuhke me sohte nemeneme!

⁵Aramas akan wering irail oh pwakihirailla, rasehng ma re weriwering sounpirap akan.

⁶Re kin kousoan nan pwoaren paip akan, nan pwoahr me weiweida ni keilen paip akan.

⁷Re weriwer duwehte mahn en nanwel akan oh wendi kospene pahn dihpw kan!

⁸Pwihn soh katepe oh sohte wadarail! Re peukeussang nan sahpwo.

⁹Eri, met re kodohn kouruhrkin ie; sohte ngehi mehkot, ahpw ihte arail mehn kepit.

¹⁰Re sautikin ie; re medemedewe me re mwahu sang ie, oh re pil kin kendipiong ni mesei.

¹¹Pwehki Koht eh ketin kaluweteiehla oh kapaisuwedihiehla, re uhkihong ie arail lingeringer.

¹²Pwihn wet kin uhwong ie wasa koaros me I kin kohla ie; re kin pwakih ie; re onopadahr soahng suwed me re pahn wiahiong ie.

¹³Re sopukiehla oh song en kauweiehla; oh sohte emen me pahn katokihiraildi.

¹⁴Re duwallong nan pwoahr me perepere ie oh tangodohng pohi;

¹⁵I rerrerki ei masepwehk; ei wahu sohralahr rasehng tumwenieng ehu, oh ei pai sohrala rasehng pelien depwek pali.

¹⁶Eri, met I nektehn mehla; sohte maiauda en ei lokolok.

¹⁷Tih kat koaros kin medek nipwong; medek me kin doakoadoako ie sohte tokedi.

¹⁸Koht ketin koledier tepinwereiet oh waikpesengier ei likou kan.

¹⁹E ketin keseiedier nan pwelmatak; I sohte siksang pwehl.

²⁰Maing Koht, I patohwan likweriong komwi, komwi ahpw sohte ketin sapeng; oh ni ei kapakap, komwi kin ketin pohnsehse.

²¹Komwi ketin wiakauweielahr; komwi ketin kalokehkin ie sapwellimomwi manaman unsek.

²²Komwi ketin mweidohng kisinieng en ipiriehla; komwi ketin keseieseli nan melimel laud.

²³I patohwan ese me komwi pahn ketin pangielahr ong mehla, imwilahn mehkoaros me momour.

²⁴Dahme komwi mahwenkihong aramas emen me ohlahr, me sohte kin wia mehkot pwe ihte peki kupwurkalahngan?

²⁵I seu kin iang aramas akan sengiseng ni ahnsou apwal, de nsensuwedkihla irail kan me paisuwedlahr?

²⁶I koapworopworki peren oh marain, ahpw apwal oh rotorot me lelohng ie.

²⁷I ohkilahr kowahlap pwunod oh medek; rahn koaros I kin wie lokolok.

²⁸I kin kohkohseli diren nsensuwed, sohte kamarainpei; I kin uh nan pokon oh pekipeki sawas.

²⁹Ngilei me diren pahtou oh sangat rasehng ngilen kidi en wel oh osris.

³⁰Kiliet toantoallahr; I mwasingkilahr soumwahu karakar.

³¹Mahs I kin rongorong ngilen keseng kaperen, ahpw met I kin rongorongete ngilen mwahiei oh sengiseng.