Read Pohnpeian Sohp 32 Bible Online

Sohp 32 - Pohnpeian bible

Sohp 32

¹Pwehki Sohp eh ngidingidki eh mwakelekel, ohl silimeno ahpw sohla song en sapeng ih.

²Ahpw ohl emen me ede Elihu me iang mihmi wasao ahpw sohla kak kanengamahiong eh lingeringer, pwehki Sohp eh akupwungki pein ih oh kapwukohnki Koht mehkoaros. (Elihu nein Parakel pwutak, kadaudok en Pus, oh kisehn peneineien Ram.)

³E pil lingeringer pahn kompoakepahn Sohp ohl silimeno. Ar sohte kak sapeng Sohp, oh met likamwete Koht me sapwung.

⁴Pwehki Elihu me keieu pwulopwul wasao, kahrehda e sohte iang pato lao irail kaimwisakala arail pato kan.

⁵Ni eh patohwan me ohl silimeno sohte kak sapeng Sohp, e ahpw lingeringerda

⁶oh tapihada pato. Elihu I me pwulopwul, a kumwail me mah, eri, I masak patohwanohng kumwail dahme I medemedewe.

⁷I medemedewe me kumwail me uhdahn pahn mahsen, kumwail me mah kan uhdahn pahn sawaski amwail kupwurokong.

⁸Ahpw iet pwe ngenen Koht Wasa Lapalahpie me kin ketikidohng aramas kupwurokong.

⁹Kaidehn aramas ar kin mahla me kahrehiong ar kin kupwurokongla de kahrehiong ar pahn ese dahme pwung.

¹⁰Eri, met I men kumwail en karonge ie mahs; I pahn patohwanohng kumwail ei tungoal lamalam.

¹¹I nennenla rongorong nindokon amwail mahmahsen oh awiawih amwail raparapahki mahsen en kupwurokong kan.

¹²I tehk ni keneinei, I ahpw diarada me kumwail sohte pweida; kumwail sohte kasapwunge dahme Sohp koasoiaier.

¹³Ia duwen amwail kak koasoia me kumwail diaradahr kupwurokong? Koht uhdahn pahn sapeng Sohp, pwe kumwail sohte kakohng.

¹⁴Sohp mahseniong kumwail, e sohte mahseniong ie, eri, ei pasapeng sohte mwahn pahn duwehte amwail.

¹⁵Maing Sohp, arail koasoi kan sohte wia sawas ehu; sohte me re kak sapengkin komwi.

¹⁶Ia duwe, I en awiawih ni arail nennenlahr? Re kesikesihnenehr solahr me re pahn koasoia.

¹⁷Soh, I pahn wiahier pein ei pasapeng met oh patohwanohng komwi dahme ei tungoal lamalam.

¹⁸I solahr kak nennenla. I solahr kak kolokol ei pato kan.

¹⁹Ma sohte ei ahnsou mwahu en pato, I pahn sawapeseng rasehng edin wain me direkihla wain kapw.

²⁰I solahr kak kanengamah; I uhdahn pahn pato.

²¹I sohte pahn uhpalihki emen nan akupwungpene wet; I sohte pahn kapinga emen.

²²I sohte kin ese mwomwen lokaiahn kaping, oh Koht pahn mwadangete kalokei ie ma I pahn wia met.