Read Pohnpeian Sohp 36 Bible Online

Sohp 36 - Pohnpeian bible

Sohp 36

¹Kanengamahiong ekis mahs oh rong ie, rong dahme I pahn patohwan ni mwaren Koht.

²Kanengamahiong ekis mahs oh rong ie, rong dahme I pahn patohwan ni mwaren Koht.

³I ese soahng tohto oh I pahn doadoahngki dahme I ese pwe I en kasalehda me Koht, me ketin kapikiehdao, me pwung.

⁴Sohte mehkot me I pahn patohwanohng komwi pahn likamw; ohl loalokong mehlel men me patopato mwohmwi.

⁵Ia uwen roson en Koht! E sohte kin ketin kalahdeki emen; sohte mehkot me e sohte ketin mwahngih.

⁶E sohte kin ketin mweidohng me dipan akan en mour werei, oh e kin ketin kupwurehki me semwehmwe kan pwuhng.

⁷E kin ketin sinsile me pwung kan; e kin ketin mweidohng irail en kaunda wasa duwehte nanmwarki kan oh kupwurehda pwe re en waunla kohkohlahte.

⁸Ahpw ma aramas kin selikihdi sel mete, wie lokolongki mehkan me re wiadahr,

⁹Koht kin ketin kasalehiong irail diparail kan oh ar aklapalap.

¹⁰E kin ketin kupwurehda pwe re en rong sapwellime kapehm kan pwe re en sohpeisang me suwed.

¹¹Ma re pahn peikiong Koht oh uhpah, re pahn paiamwahu oh popohl.

¹²Ahpw ma soh, re pahn mehla nan ar pweipwei oh kotehla piletik me kolahng nan sapwen me melahr akan.

¹³Irail kan me sohte ar Koht kin lingeringer poatopoat, oh mehnda ma re ale lokolok, ahpw re sohte kin kapakap oh peki sawas.

¹⁴Re kin mehla ni ar wie pwulopwulte, oh ohkihla kowahlap mour kanamenek.

¹⁵Ahpw Koht kin ketikihong aramas lokolok pwehn wia padahk ehu ong irail, oh ketin doadoahngki apwal pwehn kamwakidada kapehdirail kan.

¹⁶Koht ketikihsang komwi nan apwal, oh ketin mweidohng komwi en pereperenki omwi paiamwahu; omwi tehpel direkihla kisin tungoal akan.

¹⁷Ahpw met, komw aleier lokolok me konehng komwi.

¹⁸Komwi kanahieng pwe komwi dehr lohdi pahn pweipwei sapwung, de kepwehpwe en kahrehiong komwi en pwupwula.

¹⁹E sohte pahn wia kamwahu ehu ong komwi en peki sawas; omwi kehl koaros met solahr kak sewesei komwi.

²⁰Komw dehr kasik pwohng en leledo, ni ahnsou me wehi kan pahn ohla.

²¹Kanahieng dehr sohpeiong me suwed; komwi aleier lokolok pwehn sinsilei komwi sang me suwed.

²²Tamataman ia uwen lapalap en sapwellimen Koht manaman; iei ih sounpadahk me keieu lapalap sang koaros.

²³Sohte me kak patohwanohng Koht dahme e pahn ketin wia de kapwukohneki me ih me wiewia me suwed.

²⁴Kapingpen sapwellime wiewia kan kin wiawi ahnsou koaros; komwi uhdahn pahn pil kapinga ih.

²⁵Aramas koaros kilangehr wiepen nin lime kan; ahpw kitail kin kilangete sang wasa doh.

²⁶Kitail sohte kak wehwehkihla sapwellime lapalap ni unsek de tohtohn sapwellime sounpar akan.

²⁷Iei ih Koht me kin ketikihsang pilen sampah oh kawekiong ni dingiding en keteu.

²⁸E kin ketin kamwerehdihsang keteu nan depwek pwehn kalamwurih aramas koaros.

²⁹Sohte me wehwehki mwomwen mwekid en depwek kan de mwomwen ngirisek en nansapwe nan depwek, wasa me Koht kin ketiket ie.

³⁰E kin ketikihdo piripir en lioal wasa koaros nan depwek, ahpw kepin nan madau kin wie rotorotete.

³¹Met iei duwen eh kin ketin katungoale aramas oh ketikihdo reken kisin tungoal.

³²E kin ketin kolekihdi nin lime piripir en lioal, oh ketin mahsanihong en kolahng wasa me e kupwurki.

³³Nansapwe kin pakairkihdo melimel me kohkohdo, oh kou kan kin ese me e pahn melimel.