Read Pohnpeian Sohp 37 Bible Online

Sohp 37 - Pohnpeian bible

Sohp 37

¹Melimel kin kasaloweiehda.

²Kumwail rong, kumwail koaros, duwen kapitien Koht, ngirisek en nansapwe me peipeido sang nin doauese.

³E kin ketin kadar lioal pahnlahng, sang apali sampah kolahng apali.

⁴Eri, kapitie ahpw kin sansalada, ngihl kamasapwehk en nansapwe, nindokon lioal eh kin wie piripir.

⁵Soahng kapwuriamwei kan kin wiawi ni ahnsou me Koht kin ketin mahsen, soahng kaselel kan me kitail sohte kak en dehdehki.

⁶E ketin mahsanih sinoh en mweredi pohn sampah, oh ketikihdo keteu mwuledek.

⁷E kin ketin katokihedi en aramas akan doadoahk; e kin ketin kasalehiong irail dahme e kak wia.

⁸Mahn lawalo kan kin pedolong nan imwarail kan.

⁹Engin melimel kin ipisang palieir, oh wahdo kisinieng kopou sang paliepeng.

¹⁰Engin doauesen Koht kin kalamwurihala pihl akan, oh wiahkihla aihs.

¹¹Lioal kin piripir sang nan depwek

¹²ni ar kin mwekimwekidki kupwur en Koht. Re kin kapwaiada soahng koaros me Koht kin ketin mahsanih, wasa koaros nan sampah.

¹³Koht kin ketikihdo keteu nin sampah; mweinele e ketikihdo pwehn kalokehki aramas akan, de en kasalehiong aramas sapwellime kupwuramwahu.

¹⁴Nennenla ekis ahnsou, Sohp, oh rong mahs; medemedewe soahng mwahu kan me Koht ketin wiadahr.

¹⁵Komw ese ia duwen Koht eh kin ketin koasoanehdi oh kupwurehda lioal en piripirsang nan depwek kan?

¹⁶Komw ese ia duwen depwek eh kin tangatang pahnlahng, wiepen nin limen Koht kapwuriamwei?

¹⁷Soh, pwe ihte komw kin lokolongki karakar ni ahnsou me kisinieng en palieir kin kahpwalihala sahpw.

¹⁸Komw kak sewesehki Koht wiepen pahnlahng oh kamelengilengihala duwehte mete melengileng?

¹⁹Komw padahkihong kiht dahme se pahn patohwanohng Koht; sohte audepen at lamalam; sohte mehkot se kak patohwan.

²⁰I sohte pahn peki I en pato pahn kupwur en Koht; dahme I pahn patohwankihong ih ahnsou mwahu pwe en kauweiehla?

²¹Eri, met marain en pahnlahng inenen lingaling, me kamahl ong kitail en kilenglahng; oh pahnlahng kin mwakelekelkihda kisinieng.

²²Lingaling kin pwarada paliepeng, oh lingan en Koht kin kadirehkinkitailla lammwin kowahlap.

²³Sapwellimen Koht manaman me lapalahpie kahrehda kitail sohte kak kerenlahng; ih me ketin pwung oh mehlel nan sapwellime wiewia kan ong aramas.

²⁴Ihme kahrehda, aramas koaros kin lemmwiki ih, oh e kin pohnsehse koaros me kin kosekose me irail me loalokong.