Read Pohnpeian Sohp 39 Bible Online

Sohp 39 - Pohnpeian bible

Sohp 39

¹Ke ese ahnsou me kuhten wel kan kin ipwidi? Ke kin tehk duwen tiehn wel kan ar kin neitik?

²Ke kin ese wadek sounpwong en ar liseian, oh ahnsoun ar pahn kin neitik?

³Ke kin ese ahnsou me re pahn wendi oh kaipwidi wahnedirail kan?

⁴Ke ese duwen ar kin apwalih oh kakairada wahnedirail kan nanwel, oh duwen ar kin tohrohrala sang irail oh sohla pwurodo?

⁵Ihs me kihong saledek rehn ahsen nanwel kan? Ihs me kin lapwairailda pwe re en kin sansaledekseli?

⁶Ngehi me kihong irail dewerail nan sapwtehn, oh nan mall akan pwe re en kin kousoan ie.

⁷Re kin dohla sang mwoarong en kahnimw kan, oh sohte me kak kamandairailla oh koadoadoahkih irail.

⁸Nahna kan, iei wasa re kin mwenge ie, wasahn ar rapahki kanarail dihpw.

⁹Ia duwe, kou lawalo kan pahn men doadoahkohng uhk, de re pahn men kin pweidi nan dewen mahn akan rehmw?

¹⁰Ke kak salihedi tumwe oh doadoahngki pwe en deipwelihada sapwomw, oh kapatapatahla?

¹¹Ke kak koapworopworki eh kehlail laud, oh likihong omw doadoahk toutou kan?

¹²Ke lemeleme me e pahn wahdo rehmw wahnsapwomw, oh rikpene wahn wihd nan omw wasahn kamwakele wahn wihd?

¹³Ia uwen pitipit en likapip en soangen mahn me adaneki ostris! Ahpw sohte ostris men kin kak pihr duwehte sidoahk.

¹⁴Ostris kin kutoahrdiong nanpwel, pwe karakar en pwehl en kin sewese kasawa eh kutoahr kan.

¹⁵E kin sasairki me kutoahre kan kak tiatipeseng, oh mahn lawalo kan kak kangala.

¹⁶E sohte kin tehk kutoahre kan, oh sohte kin nsenohki ma sohte epwelparail.

¹⁷Eri, iei ngehi me wiahda en kin mwomwen pweipwei, oh I sohte kihong en loalokong.

¹⁸Ahpw ni eh kin tapihada tang, e marahrahsang oahs me aramas kin dake.

¹⁹Ih kowe, Sohp, me kin kihong oahs akan ar kehlail, oh kin kalinganahki pohn tepinwararail wune kan?

²⁰Ih kowe me kin kalus irail, rasehng loukust kei, oh kamasangki aramas akan ngilen nan tumwarail?

²¹Re kin sarepki pehrail pwehl nan wahu kan, nan mahwen re kin tenge ar imwintihti kan ni uwen ar kehlail koaros.

²²Re sehse dahkot masepwehk, oh sohte kedlahs pwoat kak kapweiekiraildi.

²³Tehtehn mahwen kan rehn soundake oahs akan kin sekesek oh piripir pahn ketipin.

²⁴Oahs akan kin rerrerki ar saloh nan mahwen, ahpw re kin wonlahte mwowe; ni ngilen sowi eh kin pepeuk, sohte me kak kapweiekiraildi.

²⁵Ni ar kin rongada ngilen sowi, re kin sapengki ngilen nan tumwarail. Ni arail dohsang mahwen, re kin kehnda dahpekpenehn karis kan, oh re kak rong ngilen kaunen sounpei kan ar ruruwes.

²⁶Ia duwe, kowe me padahkihong oahk mwomwen eh pahn pihr, ni eh kin kihpeseng peh kan pwe en pihrlahng palieir?

²⁷Ih kowe me kin ruwese ikel kan en wiahda pasarail kan wasa ilehn nahna kan?

²⁸Pasarail kan kin wiawihda pohn paip keieu ile kan, oh dewerail kan kin mi ni kumwen nahna apwal kan.

²⁹Re kin mi wasao ireirong wasa keren oh wasa doh kan, dahme re kak saikedi kanarail.

³⁰Wasa me mehla ehu kin mi ie, re kin pokonpene ie; oh kisin ikel tikitik kan kin medkihla ntahn me mehla kan.