Read Pohnpeian Melkahka Kan 10 Bible Online

Melkahka Kan 10 - Pohnpeian bible

Melkahka Kan 10

¹Maing KAUN, dahme komw ketin dohkiweisang kiht? Dahme komw ketin karirihkilahr pein komwi ni at milahr nan apwal?

²Aramas suwed kan aklapalapalahr oh wie kalokaloke me semwehmwe kan; komw kaloweiraildi nan lidip me re wiahda.

³Aramas suwed kin aksuweiki eh ineng suwed kan; aramas noahrok kin lahlahwe oh kin soikala KAUN-O.

⁴Aramas suwed sohte kin nsenohki KAUN-O; nan eh aklapalap e kin lemeleme me sohte katepen Koht.

⁵Aramas suwed kin pweida ni mehkoaros. E sohte kak dehdehki sapwellimen Koht kadeik kan; e kin mwamwahliki eh imwintihti kan.

⁶E kin mengimengloalki ndinda, “I sohte kak sapwungala; I sohte kak mihla nan apwal.”

⁷Eh koasoi kan kin mi ni koasoi en lahlahwe, likamw oh kamasak; e kin mwadang ong lokaiahn kailok oh suwed.

⁸E kin rukuruk nan kisin kahnimw kan, awiawih me sohte dipe kan pwe en kemeirailla. E kin lipoahroke irail kan me sohte ar mehkot;

⁹e rukuruk wasa rir rasehng laion emen. E kin awiawih me semwehmwe kan; e ahpw kin kaloweiraildi nan eh lidip oh tangahkiniraildoaui.

¹⁰Me lelepek lohdier kan engiengehr nanpwel; kehlail en aramas suwedo kaloweiraildier.

¹¹Aramas suwed kin mengimengloalki ndinda, “Koht sohte kin kupwurohki! E ketin karirihalahr silangi oh sohte pahn mahsanih ie.”

¹²Maing KAUN, komw ketin kaloke aramas suwed pwuko! Komw ketin kupwukupwure irail kan me kin lokolok!

¹³Ia duwen aramas suwed men e kak mwamwahliki Koht oh nda, “Koht sohte pahn kalokei ie?”

¹⁴Ahpw komw kin ketin mahsanih; komw kin ketin kilelehdi apwal oh lokolok kan oh kin ketin onopada ahnsou koaros pwe en sewese me paisuwedlahr akan. Aramas paisuwedlahr akan kin sohpeiong komwi; komwi kin ketin sewese aramas semwehmwe kan ahnsou koaros.

¹⁵Komw ketin kauwehla manaman en aramas suwed kan; kaloke kin irail sapwung kan me re wiadahr re lao tokedihsang.

¹⁶KAUN-O me nanmwarki poatopoat. Irail kan me kin kaudokiong koht teikan pahn kamwomwomwsang nan sapwellime wehi.

¹⁷Maing KAUN, komw pahn ketin karonge kapakap en me tikitik kan; komw pahn ketin kakehlahda nan kapehdirail.

¹⁸Komw pahn ketin karonge likwer en me toutoulahr akan oh me sepwoupwou kan; komw pahn ketin kadeikada ar pwung, pwe aramas me kin mour mwotomwot nin sampah wet en dehr kin kamasak irail kohkohlahte.