Read Pohnpeian Melkahka Kan 103 Bible Online

Melkahka Kan 103 - Pohnpeian bible

Melkahka Kan 103

¹Ngeni, kapinga KAUN-O! Ngeniet oh pil paliwereiet, kapinga mware sarawi!

²Ngeni, kapinga KAUN-O, oh dehr manokehla sapwellime kalahngan lapalap.

³E kin ketin mahkikihong ie dipei kan koaros, oh kin ketin kamwahwihala ei soumwahu kan koaros.

⁴E kin ketin doareiesang nan sousou oh kin ketin kupwuramwahwihkin ie limpoak oh kalahngan.

⁵E kin ketin kadirehkiniehla paiamwahu tohto, pwe I en kin wie pwulopwulte oh kekehlail duwehte ikel men.

⁶KAUN-O, ie sounkopwung men me kin sewese irail kan me toutoulahr, oh ketikihongirail arail pwuhng.

⁷E ketin kasalehiong Moses sapwellime koasoandi kan oh mweidohng mehn Israel ko re en kilang manaman en nin lime ko.

⁸KAUN-O me kalahngan oh limpoak, me kupwur kanengamah oh diren limpoak poatopoat.

⁹E sohte kin kapwung aramas ahnsou koaros; e sohte kin engieng kohkohlahte.

¹⁰E sohte kin ketin kalokei kitail nin duwen me konehng kitail; e sohte kin dupukohng kitail duwen dipatail kan oh atail sapwung kan.

¹¹A duwen ileilehn lahng sang sampah, ih duwen sapwellime limpoak lapalap ong me kin wauneki.

¹²Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan.

¹³Duwen sahm emen eh kin kadekohng nah seri kan, ih duwen KAUN-O eh kin ketin kupwurkalahngan ong irail kan me kin wauneki.

¹⁴Pwe e mwahngih dahme kitail wiawihkihda; e pil ketin tamataman me kitail uhdahn pwehl.

¹⁵Atail mour kin rasehng reh kan. Kitail kin kekeirda oh masalpeseng duwehte wahn rohs en nanwel

¹⁶me kisinieng kin ipirete, a e sohla mie-% oh sohte me kak pwurehng kilang.

¹⁷A limpoak en KAUN-O ong irail me kin wauneki kin duweduwehte kohkohlahte, oh sapwellime kupwuramwahu kin poatopoatete erein dih koaros

¹⁸rehn irail kan me kin dadaurete sapwellime inou oh kin kapwaiada mehlel sapwellime kosonned akan.

¹⁹KAUN-O ketin koasoanehdi mwoale nanleng; ih me nanmwarkien mehkoaros.

²⁰Kumwail kapinga KAUN-O, kumwail tohnleng kehlail oh manaman akan, me kin peikiong sapwellime kosonned akan, oh kin rongorong sapwellime mahsen kan!

²¹Kumwail kapinga KAUN-O, kumwail manaman koaros en nanleng, kumwail lidu kan me kin kapwaiada audepen nan kupwure!

²²Kumwail wiepen nin lime kan koaros, kumwail kapinga KAUN-O wasa koaros me e kin ketin kakaun! Ngeni, kapinga KAUN-O!