Read Pohnpeian Melkahka Kan 105 Bible Online

Melkahka Kan 105 - Pohnpeian bible

Melkahka Kan 105

¹Kumwail patohwan kapingkalahngan ong KAUN-O; kumwail kalohkiseli sapwellime roson lapalap, oh kehsehki wehi kan wiepen nin lime kan.

²Kumwail koul kapikapinga KAUN-O; kumwail lohkiseli soahng kapwuriamwei koaros me e ketin wiadahr.

³Kumwail nsenamwahuki eh ketin sapwellimanikin kitail; koaruhsie me kin kaudokiong en perenda.

⁴Kumwail patohdo rapahki sawasepamwail rehn KAUN-O; oh kaudokiong ahnsou koaros.

⁵Kumwail kadaudok en Eipraam, sapwellimen KAUN-O ladu, kumwail kadaudok en Seikop, aramaso me e ketin pilada; kumwail tamanda manaman kapwuriamwei kan me Koht ketin wiahda oh kopwung kan me e ketin wiadahr.

⁶Kumwail kadaudok en Eipraam, sapwellimen KAUN-O ladu, kumwail kadaudok en Seikop, aramaso me e ketin pilada; kumwail tamanda manaman kapwuriamwei kan me Koht ketin wiahda oh kopwung kan me e ketin wiadahr.

⁷Iei ih, KAUN-O, me atail Koht; sapwellime mahsen kan pahn kowohng sampah koaros.

⁸E pahn kin ketin dadaur sapwellime inou kohkohlahte, inou kan me e ketin wiadahr erein dih koaros,

⁹inou me e ketin wiahiong Eipraam oh inou me e ketin wiahiong Aisek.

¹⁰KAUN-O ketin wiahiong Seikop inou ehu, inou ehu me pahn poatopoat kohkohlahte.

¹¹E ketin mahsanih, “I pahn kihong uhk wehin Kenan; e pahn wiahla uhdahn omw sohso.”

¹²Sapwellimen Koht aramas akan me malaulau, re wia aramas en liki kei nan Kenan.

¹³Re ahpw kakahnseli sang nan ehu sahpw kolahng nan ehu, sang nan ehu wehi kolahng nan ehu.

¹⁴Ahpw KAUN-O sohte ketin mweidohng emen en wiakauwe irail; oh e ketin kaloke nanmwarki kan pwehki irail.

¹⁵E ketin mahsanih, “Kumwail dehr sair ei ladu pilipil pwukat; kumwail dehr wia mehkot suwed ong nei soukohp akan.”

¹⁶KAUN-O ketin kadarodohng pohn sapwarail lehk lapalap oh ketikihsang irail arail tungoal akan koaros.

¹⁷Ahpw e ketin kadarala mwohrail Sosep, me netla nin duwen ladu men.

¹⁸Neh kan eri lipwalipwkihla sahl kehlail kei, me pirapiriong, oh selmete pwoat pirapiriong nin tepinwere,

¹⁹e lao pwme e kohpadahro. Mahsen en KAUN-O eri dehdehda pwe ih me pwung.

²⁰Nanmwarkien Isip eri ketikihsang Sosep nan imweteng; kaunen wehi kan eri kasaledekala.

²¹E ahpw ketin kasapwiladahng Sosep sounkohwa lapalap en tehnpese oh kaunen sapwellime wehi pokon,

²²me ahneki manaman koaros pohn sapwellimen nanmwarki soumas akan oh pwungen kaweid ong sapwellime sounkaweid kan.

²³Seikop eri soulahng Isip oh kousoanla nan sahpwo.

²⁴KAUN-O ahpw ketin kangederehla sapwellime aramas akan oh ketin koasoanehdi pwe re en kehlail sang ar imwintihti kan.

²⁵E ahpw ketin wekidala kapehd en mehn Isip ko pwe re en kailongkihla sapwellime aramas akan oh kin widiwidinge sapwellime ladu kan.

²⁶KAUN-O eri ketin poaronehla sapwellime ladu Moses, oh Aaron, me e ketin pilada.

²⁷Ira eri wiahda sapwellimen Koht wiewia lapalap ekei oh manaman kapwuriamwei kei nan Isip.

²⁸KAUN-O ketin kadaridiong rotorot mosul pohn sahpwo, ahpw mehn Isip ko sohte peikiong sapwellime mahsen kan.

²⁹E ketin kawekiong ni nta pilen ar pillap akan oh kemehla mwahmw en nan pillap ako koaros.

³⁰Sapwarailo inenen direkihla kairu kan; pil iangahki tehnpas en nanmwarkio.

³¹Koht ketin mahsente, a mwutumwut en loahng oh amwise pa audehla sahpwo pwon.

³²E ketin kadaridiong pohn sahpwo keteu aihs takai oh lioal, wiliandi keteu;

³³e ketin kamwomwala arail wahn wain oh tuhke pik kan oh ketin karaukehdi tuhke koaros.

³⁴E ketin mahsente, a loukust kan pa pipihrpene, uwen tohto ieu me sohte kak wadawad;

³⁵re ahpw kangala dihpw koaros en sahpwo; oh wahntuhke koaros.

³⁶E ketin kemehla mesenih koaros en sahpwo mesenihen peneinei koaros en Isip.

³⁷KAUN-O eri ketin kahluwaiei mehn Israel ko sang Isip; re wisik silper oh kohl, irail koaros kehlail, sohte me soumwahu.

³⁸Mehn Isip ko perenkihda ar mweselda, pwehki ar kin masak irail.

³⁹E ketin kipehkipeseng pelien depwek pali pohn sapwellime aramas ako oh ketikihong irail kisiniei pwe en kamarainih irail nipwong.

⁴⁰Re peki, a e ketin kadarodohng irail kulu kei, oh ketin kammedkinirailla kisin saken nanleng.

⁴¹E ketin ritingada paipalalapo, a pihl pa kusieisang, oh pwilipwillahng nan sapwtehn duwehte pillap pwoat.

⁴²E ketin kupwukupwurehte sapwellime inou sarawi ong Eipraam, sapwellime ladu.

⁴³Eri, e ketin kahluwaiei sapwellime aramas pilipil kan, me kokoul oh ngisingiski ar peren.

⁴⁴E ahpw ketikihong irail sapwen mehn liki kan, oh ketin mweidohng pwe re en sapwenikihla,

⁴⁵pwe re en kin peikiong sapwellime kosonned akan oh kapwaiada sapwelime mahsen kan. Kapinga KAUN-O!