Read Pohnpeian Melkahka Kan 106 Bible Online

Melkahka Kan 106 - Pohnpeian bible

Melkahka Kan 106

¹Kapinga KAUN-O! Kumwail kapingkalahngan ong KAUN-O, pwehki eh kupwur mwahu; sapwellime limpoak me poatopoat.

²Ihs me kak wehkada soahng kapwuriamwei kan koaros me e ketin wiadahr? Ihs me kak kapinga nin duwen me konehng?

³Meid pai irail kan me kin peikiong sapwellime kosonned akan, me kin kapwaiada dahme pwung ahnsou koaros.

⁴Maing KAUN, komw ketin taman ie ni ahnsou me komw kin ketin sewese sapwellimomwi aramas akan; komw ketin iangahkin ie ni omwi pahn komourirailla.

⁵Komw ketin mweidohng ie I en udiahl paiamwahu en sapwellimomwi aramas akan oh iang ahneki peren en sapwellimomwi wehi, ni kalingan kansenamwahu en irail ko me komw sapwellimaniki.

⁶Se dipadahr duwehte at pahpa kalap ako; se suwedlahr oh sapwungalahr mehlel.

⁷At pahpa kahlap ako nan Isip sohte wehwehki wiepen nin limen Koht kapwuriamwei kan; re manokehla uwen tohtohn pak me e ketin kasalehiong irail sapwellime limpoak, re ahpw kahngohdiong Wasa Lapalap ni Sehd Weitahtao.

⁸E ahpw ketin kapitirailla nin duwen me e ketin inoukihong irail, pwehn kasalehiong irail sapwellime roson lapalap.

⁹E ketin ruwese Sehd Weitahtao, a ni ahnsowohte e ngalangalada; e ahpw ketin kahre sapwellime aramas akan pohn ngalangalo.

¹⁰E ketin doareirailla sang me kin kailongkin irail; e ketin kapitirailla sang ar imwintihti kan.

¹¹Ahpw pihlo kaduhla ar imwintihti kan; sohte emen rehrail pitla.

¹²Iei me sapwellime aramas akan kamehlelekihla sapwellime inou kan oh koulki koulen kaping ong ih.

¹³Re ahpw mwadangete manokehla dahme e ketin wiadahro oh re sohte awih re en rong sapwellime kaweid.

¹⁴Re dipada nan ar ngoangkihte ahneki dipwisou nan sapwtehno oh re ahpw kasongosong Koht;

¹⁵ih eri ketikihong irail dahme re patohwan peki, e ahpw pil ketin kadarodohng irail soumwahu suwed ehu.

¹⁶Nan sapwtehno re peirinkihda Moses oh Aaron, sapwellimen KAUN-O ladu sarawio.

¹⁷Iei me sampah sarahkipeseng oh kedellahla Dadan; Apiram oh a peneinei ahpw pil serpweldi;

¹⁸kisiniei mwerediong pohn ienge ko oh kamwasikahla aramas suwed pwuko.

¹⁹Re wiahkihda kohl koupwul men ni nahna Sainai oh kaudokiong dikedik en enio;

²⁰re kawilianki lingan en Koht mwomwen mahn emen me kin kang dihpw.

²¹Re manokehla Koht me ketin kepitkinirailla manaman lapalap akan en nin lime nan Isip.

²²Ia uwen kapwuriamwei en soahng kan me e ketin wiahda wasao! Ia uwen kapwuriamwei en soahng kan nan Sehd Weitahtao!

²³Ni ahnsou me Koht mahsanih me e pahn ketin kamwomwala sapwellime aramas ako, sapwellime ladu pilipildahro, Moses, patohwanda eh tungoal tomw reh, pwe sapwellimen Koht engieng en dehr kauweirailla.

²⁴Re ahpw soikala sahpw kaselelo, pwehki ar sohte kamehlele inou en Koht.

²⁵Re ahpw mihmihte nan imwarail impwal kan oh lipilipahned oh sohte men rong KAUN-O.

²⁶Ih eri ketin kahukihla me e pahn ketin kemeirailla nan sapwtehno

²⁷oh ketin kamwarakpeseng kadaudokarail ko nanpwungen me rotorot akan, oh mweidohng re en mehla nan wehin liki kan.

²⁸Eri nan Peor, sapwellimen Koht aramas ako ahpw iang kaudokiong Paal oh iang tungoalehda mehn meirong ko me meirongalahr ong koht akan me sohte mour.

²⁹Soangen tiahk pwukat ahpw kahngiangihada KAUN-O, iei me soumwahu suwed ehu pwarada nanpwungarail.

³⁰Pineas eri uhdahte oh kaloke me dipada ko, soumwahu suwedo ahpw tokedi.

³¹Sang rahno kohla katamenpen ire wet ahpw kin wiewiawi, oh pahn kin wiawi kohkohlahte.

³²Ni pwarer en Meripa aramas ako ahpw kahngiangihada KAUN-O, Moses eri pwukoahkihdi arail kahpwal ko.

³³Re inenen kansensuwedihada kowahlap me kahrehiong eh koasoakoasoi oh sohte uhdi oh medewe dahme eh koasoia.

³⁴Re sohte kemehla me rotorot akan, duwen me KAUN-O ketin koasoanediong irail,

³⁵ahpw re kin pwoudikinirailda oh iang wia ar tiahk rotorot kan.

³⁶Sapwellimen Koht aramas ako kin kaudokiong dikedik en eni kan, oh met kahrehda ar mwomwla.

³⁷Re kin mweidala pein nair pwutak oh serepein kan pwehn wia mehn meirong ong dikedik en eni kan en Kenan.

³⁸Re kin kemehla seri me sohte dipe ko, pwelen sahpwo ahpw kin saminkihla kamakamala pwukat.

³⁹Re kin saminkihla pein ar wiewia samin kan oh kin soaloalopwoat ong Koht.

⁴⁰KAUN-O eri ketin engiengda pahn sapwellime aramas ako; oh ketin kalahdkinirailla.

⁴¹E ketin mweidohng pwe re en mihla pahn manaman en me rotorot akan, arail imwintihti kan uhd kauniraildahr.

⁴²Ar imwintihti kan katoutouwihiraillahr oh re uhdahn milahr pahn arail manaman.

⁴³Pak tohto KAUN-O ketin kapitala sapwellime aramas ako, re ahpw kin pilada pwe re en uhwong oh kihrla douluhl nan dihp.

⁴⁴KAUN-O ahpw ketin karonge irail ni ar kin likweriong e ahpw kin ketin mahsanih arail apwal.

⁴⁵Pwehki irail, e ketin tamanda sapwellime inou, oh pwehki sapwellime limpoak lapalap e kupwureirailla.

⁴⁶E ketin kupwurehda pwe irail kan me kaloke irail re en kin poakeirailla.

⁴⁷Maing KAUN, at Koht, komw ketin kapitkitala, komw ketin kapwureikitodo sang nan wehi kan, pwe se en kin kapingkalahngan ong komwi oh kapikapinga mwaromwi me sarawi.

⁴⁸Kapinga KAUN-O, Koht en Israel; kumwail kapinga met oh pil kohkohlahte! Koaruhsie en patohwan, “Amen!” Kapinga KAUN-O!