Read Pohnpeian Melkahka Kan 107 Bible Online

Melkahka Kan 107 - Pohnpeian bible

Melkahka Kan 107

¹“ Kitail kapingkalahngan ong KAUN-O, pwehki ih me kalahngan; sapwellime limpoak kin poatopoatete!”

²Kuwmail koaros me e ketin kamouralahr, kumwail pwurehng kapwurehiong mahsen en kapingkalahngan pwukat ong KAUN-O. E ketin kapitkumwaillahr sang amwail imwintihti kan

³oh ketin kasapahlkumwaildo sang sapwen liki kan, sang ni mesenleng oh kepinleng, sang ni paliepeng oh palieir.

⁴Ekei irail sansalongselier nan sapwtehn sohte kak diarada kahnimw ehu me re pahn kousoanla ie.

⁵Nan ar duhpeklahr oh men nimpildahr e ahpw sohla ar koapworopwor.

⁶Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.

⁷E ketin kahluwa irail nan ahl inenen ong nan kahnimw me re en kousoan ie.

⁸Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.

⁹E kin ketin kanimpilehda me men nimpildahr akan oh kin ketin katungoalehkihda kisin tungoal mwahu me men mwengedahr akan.

¹⁰Ekei mihmiher nan ar nsensuwed oh rotorot, re senselki selmete oh wie lokolok,

¹¹pwehki ar kahngohdiong kosonned en Koht, Wasa Lapalap, oh soikeweisang rehrail sapwellime kaweid kan.

¹²Solahr angirail pwehki ar doadoahk laud; re ahpw kin pwupwudi, oh sohte me men sewese irail.

¹³Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.

¹⁴E ahpw ketikinirailsang nan ar nsensuwed oh rotorot, oh ketin kamweidpeseng seliparail kan.

¹⁵Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.

¹⁶E kin ketin kauwehla wenihmw mete kan oh ketin sukpeseng kateng metehn wenihmw kan.

¹⁷Ekei me pweipwei oh soumwahukihda diparail kan re ahpw wie lokolongki ar sapwung kan;

¹⁸re kin men mwuski soangen kisin tungoal akan oh re kereniong mehla.

¹⁹Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.

²⁰E ketin kamwahwihkinirailla sapwellime mahsen oh ketin kapitirailla sang nan sousou.

²¹Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.

²²Re uhdahn pahn kasapahlkalahngankihong ar meirong kan, oh ngisingiski ar peren oh lohlohkiseli wiepen nin lime kan.

²³Ekei kin dake sohp seiseiloakseli nan madau kan, raparapahkiseli arail mour.

²⁴Re udiahlehr dahme KAUN-O kak wia, wiepen nin lime kapwuriamwei kan nan madau.

²⁵E ketin mahsente, a iet melimel wiawiher, oh kamwakidada iloak kan.

²⁶Sohp kan kin kepihrdahng nan wehwe oh lekdekdiong nan kepin madau; kapehdirail ahpw tikitingkihla duwen ar keper.

²⁷Re ahpw dipekelekel oh weuwasasseli, likamwete aramas sakaula kei-% ar koahiek en nan madau sohla katepe.

²⁸Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.

²⁹E ketin kamwelehdi wasa, oh kameleileidi iloak kan.

³⁰Re ahpw nsenamwahukihla mwelehdien madawo, oh e ketin kahluwairailwohng ni wasa me re seiseiloakwohng ie.

³¹Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.

³²Re uhdahn pahn kalohki roson lapalap wet nan pokon en aramas akan oh kapinga mwohn wie kupwur en me mah kan.

³³KAUN-O ketin kammadahda pillap akan oh ketin katokehdi utuhnpihl kan pwe en dehr pwilipwiliwei.

³⁴Oh sahpw kaselel kan e ketin wekidohng ni sapwtehn en soahl pwehki suwedlahn towe kan.

³⁵E ketin kawikala sapwtehn kan kawekiong ni lehn pihl, oh sahpw madekeng kan ni utuhnpihl.

³⁶E ahpw ketin mweidohng me duhpeklahr akan re en kousoanla wasa ko, re ahpw kauwada ie kahnimw ehu, pwe re en kousoanla ie.

³⁷Re ahpw sapwasapwala ie oh koadoahkihada ie ar mwetin wain me kapwarehda wah mwahu tohto.

³⁸E ahpw ketin kupwuramwahwih sapwellime aramas ako, re ahpw kaparaparala kowahlap; oh e pil ketin kangederehla neirail mahn akan.

³⁹Ni sapwellimen Koht aramas ako ar lohdi oh sarohdi, pwehki apwal mwuledek oh kehnaudek,

⁴⁰e ketin kasalehda eh sohte ketin kupwurohki kupwur en sohpeidi ko me kahpwalahla sapwellime ko; iei me e ketin wia pwe re en kakahnseli nan sapwtehn, wasa me sohte ahl kin dierek ie.

⁴¹Ih eri ketin kapitala me paisuwed akan sang nan ar apwal oh ketin kangederehla tohn arail peneinei duwehte pelinmen kei.

⁴²Me pwung kan kin kilang met, oh re kin nsenamwahukihla, a me suwed kan kin nennenlahte, sopeimwekid.

⁴³Me loalokong kan en medemedewe mepwukat; re en pil medemedewe sapwellimen KAUN-O limpoak poatopoat.