Read Pohnpeian Melkahka Kan 108 Bible Online

Melkahka Kan 108 - Pohnpeian bible

Melkahka Kan 108

¹Maing Koht, ni ei koapworopwor unsek, I pahn koul oh kapinga komwi! Ngeni, pirida!

²Nei arp oh lair, kumwa pirda! I pahn pangenda ketipin.

³Maing KAUN, I pahn kasapahlkalahngan ong komwi nanpwungen wehi kan. I pahn kapinga komwi nanpwungen aramas akan.

⁴Sapwellimomwi limpoak poatopoat kipe wasa koaros nanleng; sapwellimomwi loalopwoat kin leldawohng pahnlahng.

⁵Maing Koht, komw ketin kasalehda sapwellimomwi lapalap pahnlahng, oh sapwellimomwi lingan wasa koaros nin sampah.

⁶Komw ketin komourkinkitala sapwellimomwi manaman; komw ketin sapeng ei tungoal kapakap, pwe irail kan me komwi kin ketin loalloale re en kapitipitla.

⁷Koht ahpw ketin poahngok sang nan mwoale sarawio, mahsanih, “Ni manaman en powehdi I pahn pwalangpeseng Sekem oh nehkpeseng Wahun Sukot rehn nei aramas akan.

⁸Kilead ngehi me uhdahn pahn ahneki, Manase pil duwehte; Epraim iei ei lisoarop en mahwen oh Suda ei sokon en nanmwarki.

⁹Ahpw I pahn doadoahngki Mohap duwehte nei dahl en epwinek, I pahn kesehdiong pohn Edom ei suht, kilel en eh uhdahn ahi. I pahn kadekedengki ei powehdi mehn Pilisdia kan.”

¹⁰Maing Koht, ihs me pahn kahreielahng nan kahnimw kehlailo? Ihs me pahn kaluwaielahng Edom?

¹¹Ia duwe, mehlel me komw ketin soingkitalahr? Komw sohte pahn ketin iang kahluwa at tungoal karis kan?

¹²Komw ketin sewesei kiht pelian at imwintihti kan; pwe sawas en aramas me mwahl oh sokatepe.

¹³Ma Koht pahn ketin iang kitail, kitail pahn powehdi; ih me pahn ketin kalowehdi at imwintihti kan.