Read Pohnpeian Melkahka Kan 109 Bible Online

Melkahka Kan 109 - Pohnpeian bible

Melkahka Kan 109

¹Maing Koht, I patohwan kapinga komwi; komw dehr sohte ketin kasalehda kupwuromwi!

²Aramas suwed oh likamw kei uhwongieier. Re kin kinesang ie likamw,

³oh re kin koasoia kin ie mehkot suwed, re uhwong ie ni so kahrepe.

⁴Re kin uhwong ie, mehnda ma I poakepoake irail oh kin kapakapkin irail.

⁵Re kin dupungki me suwed ei wiewia mwahu oh kailok ni ei kin poakohng irail.

⁶Komw ketin pilada emen sounkopwung mwersuwed pwehn wia kopwung en ei imwintihtio, oh mweidohng emen eh imwintihti kan en wia sounkedipa.

⁷En ale kopwung oh dierekda nan dihp; eh kapakap en pil wiahla dihp toutou!

⁸Eh mour en mwadang imwisekla; oh emen tohrohr en sepwildahng nan dewe!

⁹Nah seri kan en sepwoupwoula, oh eh pwoud en liohdihla!

¹⁰Nah seri kan en tangasang ni imwarail kan oh wie pekipekseli nanial akan; re en pil pekeussang nan ar wasa kan!

¹¹Me e pwaipwandohng kan en adihasang eh dipwisou, oh mehn keiru kan en kihsang wahn eh doadoahk.

¹²En dehr diar mehmen me pahn kadek ong de apwalih nah seri sepwoupwou kan.

¹³Kadaudoke kan koaruhsie en mehla, oh sohte mehmen en tamataman ih erein dih kan me pahn kohdo.

¹⁴KAUN-O en ketin tamataman dipen eh pahpa kahlap ako oh en dehr mahkikihong dipen ine kan.

¹⁵KAUN-O en kin tamataman diparail kan ahnsou koaros, oh irail en manoknokla douluhl!

¹⁶Aramas meno sohte mwahn kin kolokol kadek nan kapehde; e kin kaloke oh kemehla me semwehmwe, me paisuwed, oh me luwet akan.

¹⁷E kin mwahuki keriahla meteikan-eri pein ih en riahla! E kin kahng kapaiahda meteikan-eri sohte mehmen pahn kapaiahda!

¹⁸E ahnlahr keriahla aramas duwehte eh ahnlahr pein likouda; eh keria kan en pwurolong nan paliwere rasehng pihl oh lel nan tihn paliwere rasehng leh!

¹⁹Eh keria kan en pwaindi paliwere rasehng likou oh kapilpene rasehng kateng ahnsou koaros!

²⁰Maing KAUN, komw ketin kaloke ei imwintihti kan nin duwe met-% irail kan me kin kehrehng ie soahng suwed pwukat!

²¹Ahpw Maing KAUN, Wasa Lapalahpie, komw ketin sewesei ie nin duwen me komw ketin inoukidahr, oh ketin kapitiehla pwehki kalahngan en sapwellimomwi limpoak.

²²Aramas semwehmwe men ngehi oh paisuwed; mohngiongi tihwolahr kowahlap.

²³I nektehn sohrala rasehng mwetehn nin soutik; I pipihrseli rasehng mensiek men.

²⁴Nan pwukiei kat luwetkilahr eh sohte ei tungoal kisin mwenge; kiliet oh tih katte me luhwehdi ni paliwereiet.

²⁵Ni aramas akan ar kin kilang ie, re kin kouruhrkin ie; re kin tuhtuwelengki ar kouruhr.

²⁶Maing KAUN ei Koht, komw ketin sewesei ie; pwehki sapwellimomwi limpoak poatopoat, komw ketin doareiehla!

²⁷Komw kehsehki ei imwintihti kan me komwi me ketin doareiehla.

²⁸Mweinele re pahn kerieiehla, ahpw komwi pahn ketin kupwuramwahwihiehla. Me kin pwakipakih ie kan re en lohdi, oh ngehi, sapwellimomwi ladu, en kin pereperen.

²⁹Ei imwintihti kan en namenekla kowahlap; oh re en mihla nan namenek rasehng ar pwuhriong nan likou reirei.

³⁰I pahn wia ei kapingkalahngan ni ngihl laud ong KAUN-O; I pahn kapinga nan pokon en aramas akan,

³¹pwehki eh ketin doarehla aramas semwehmwe menet oh kapitasang irail kan me kin kadeikada pwe en kamakamala.