Read Pohnpeian Melkahka Kan 111 Bible Online

Melkahka Kan 111 - Pohnpeian bible

Melkahka Kan 111

¹Kapinga KAUN-O! I pahn kasapahlkalahngan ong KAUN-O sang nan kapehdi unsek mwohn pokon en sapwellime aramas akan.

²Ia uwen kapwuriamwei en soahng kan me KAUN-O kin ketin wia! Koaros me kin perenkihda kin men wehwehkihla mehlel.

³Sapwellime wiewia kan koaros kin diren wahu oh roson; sapwellime pwuhng me poatopoat.

⁴KAUN-O sohte ketin mweidohng kitail en manokehla sapwellime wiewia kapwuriamwei kan; ih me kupwur kadek oh kalahngan.

⁵E kin ketikihda kisin tungoal ong irail kan me kin wauneki; e sohte kak meliehla sapwellime inou.

⁶E ketin kasalehiong sapwellime aramas akan sapwellime manaman ni eh ketikihong irail sapwen mehn liki kan.

⁷E kin ketin loalopwoat oh pwung ni soahng koaros me e kin ketin wia; sapwellime kosonned kan sohte kin wekidekla.

⁸Re kin wie poadopoad kohkohlahte; pwe re poahsoankihda mehlel oh pwung.

⁹E ketin kasaledekala sapwellime aramas ako oh ketin wiahiong irail inou poatopoat ehu. Ih me sarawi oh manaman!

¹⁰Elen loalokongla iei wauneki KAUN-O; e kin ketin kupwurokong en wia kadeik pwung ong irail kan me kin wauneki. Kapingpe pahn wiewiawi kohkohlahte.