Read Pohnpeian Melkahka Kan 112 Bible Online

Melkahka Kan 112 - Pohnpeian bible

Melkahka Kan 112

¹Kapinga KAUN-O! Meid pai aramas me kin wauneki KAUN-O, me kin alehki eh peren sang ni eh kin kapwaiada sapwellime kosonned akan.

²Nein aramas mwahu seri kan pahn ahneki manaman nan sahpwo; kadaudoke kan pahn ale kupwuramwahu.

³Eh peneinei pahn paiamwahu oh kepwehpwe, oh e pahn paiamwahu kohkohlahte.

⁴Marain kin dakerada rotorot ong aramas mwahu kan, ong irail kan me kalahngan, kadek, oh pwung.

⁵Meid pai aramas me kin kadek ni eh kin kihwei lohn, me kin wia eh doadoahk en netinet ni mehlel.

⁶Aramas mwahu sohte pahn sapwungala; e sohte pahn manoknokla kohkohlahte.

⁷E sohte kin masak rong rohng suwed akan; eh pwoson me kehlail, oh e kin likih KAUN-O.

⁸E sohte kin pwunod de masepwehk; e koapworpworki me e pahn kilang eh imwintihti kan ar pahn lohdi.

⁹E kin sapan ong me paisuwed akan, oh eh kadek kin duweduwehte; e pahn ahneki manaman oh wahun.

¹⁰Aramas suwed kan re kilang met oh lingeringerkihda; re kangkakilkin irail ar kailok oh irail kohkohla; arail koapworopwor sohralahr kohkohlahte.