Read Pohnpeian Melkahka Kan 113 Bible Online

Melkahka Kan 113 - Pohnpeian bible

Melkahka Kan 113

¹Kapinga KAUN-O! Kumwail sapwellimen KAUN-O ladu kan, kumwail kapinga mware!

²Kapingpen mware en wiawi, met oh pil kohkohlahte.

³Sang palimese lel palikapi kumwail kapinga mwaren KAUN-O!

⁴KAUN-O kin ketin kakaun wehi kan koaruhsie; sapwellime lingan sikdala sang nanleng.

⁵Sohte emen duwehte KAUN-O, atail Koht. E kin ketiket powe wasa ileilehie,

⁶ahpw kin ketin mahsendihdo oh ireirong nanleng oh sampah.

⁷E kin ketin pwekada me semwehmwe kan sang nanpwel; e kin ketin kasapwilada me paisuwedlahr akan sang ar apwal

⁸oh kin ketin wiahkinirailla werek en me lapalap akan, me lapalap en sapwellime aramas akan.

⁹E kin ketin kawauwihala lih depwen kan nan imwarail kan; oh kapaiahkin irail seri. Kapinga KAUN-O!