Read Pohnpeian Melkahka Kan 115 Bible Online

Melkahka Kan 115 - Pohnpeian bible

Melkahka Kan 115

¹Maing KAUN, lingan uhdahn pahn kowohng komwihte, e pahn kowohng komwihte, a kaidehk ong kiht, pwehki sapwellimomwi limpoak poatopoat oh loalopwoat.

²Dahme tohn wehi teikan kin idengki reht, “Ia amwail Kohten?”

³Atail Koht kin ketiket nanleng; e ketin wiewia mehkoaros me e kin ketin kupwurki.

⁴Arail koht akan me kin wiawihkihda silper oh kohl, re uhdahn wiepen pehn aramaste.

⁵Mie awarail, re ahpw sohte kak lokaia, mie masarail, re ahpw sohte kak kilang wasa,

⁶mie salengarail, re ahpw sohte kak rong wasa, mie tumwarail, re ahpw sohte kak ned mehkot.

⁷Mie pehrail, re ahpw sohte kak doahke mehkot, mie nehrail, re ahpw sohte kak alu; sohte ngihl ehu kak kohda sang nan kapinwararail kan.

⁸Me kin wiahda koht likamw pwukat, oh pil likih irail re en duwehla dikedik en eni kan me pein irail wiadahr.

⁹Kumwail aramas en Israel kan, kumwail likih KAUN-O. Ih me sawasepamwail, oh silepamwail.

¹⁰Kumwail sapwellimen Koht samworo kan, kumwail likih KAUN-O! Ih me sawasepamwail, oh silepamwail.

¹¹Kumwail koaros me kin kaudokiong KAUN-O, kumwail likih. Ih me sewesepamwail, oh silepamwail.

¹²KAUN-O kin ketin tamataman kitail oh e pahn ketin kupwuramwahwih kitail; e pahn ketin kupwuramwahwih aramas en Israel kan oh pil sapwellimen Koht samworo koaros.

¹³E pahn ketin kupwuramwahwih koaros me kin wauneki ih, me lapalap oh pil me tikitik kan.

¹⁴KAUN-O en ketin kupwurehkin kumwail seri-% kumwail oh pil kadaudokamwail kan!

¹⁵KAUN-O en ketin kupwuramwahwih kumwail, ih me ketin kapikada nanleng oh sampah.

¹⁶KAUN-O kelehpw me ketin sapwellimaniki nanleng, a sampah e ketikihong aramas akan.

¹⁷Me mehlahr akan sohte kin kapinga KAUN-O, pil me kin kohdilahng nan sapwen me mehlahr akan sohte kin kapinga.

¹⁸A kitail me momour kan, kitail pahn kapingkalahngan ong ih met oh pil kohkohlahte. Kapinga KAUN-O!