Read Pohnpeian Melkahka Kan 116 Bible Online

Melkahka Kan 116 - Pohnpeian bible

Melkahka Kan 116

¹I kin poakohng KAUN-O, pwehki eh kin ketin karonge ie; e kin ketin karonge ei kapakap akan.

²E kin ketin karonge ie ahnsou koaros me I kin likweriong.

³Keper en mehla kapiliepenehr, kamasepwehk en sousou lelohngieier; masak oh pwunod kadireielahr.

⁴I ahpw likweriong KAUN-O, patohwan, “Maing KAUN, I peki rehmwi, komwi en ketin doareiehla!”

⁵KAUN-O me ketin kalahngan oh mwahu; atail Koht me diren kalahngan.

⁶KAUN-O kin ketin sinsile me paisuwedlahr akan; e ketin doareiehla, ni ei mihla nan wasa keper.

⁷Mohngiongi, koapworopwor, pwe KAUN-O kasaledahr sapwellime kupwur mwahu ong ie.

⁸KAUN-O ketin doareiehla sang mehla; e ketin katokehdi pilen mesei kat oh ketin sileiehdi, pwe I en dehr lohdi.

⁹Eri, I kin weweid mwohn silangin KAUN-O nan sapwen me momour kan.

¹⁰Ei pwoson duweduwehte, mehnda ma I patohwan, “I mihmi nan apwal laud,”

¹¹pil nan ei masepwehk oh patohwan, “Sohte emen me I kak likih.”

¹²Dahme I kak meirongkihong KAUN-O dupuk en sapwellime kalahngan ong ie?

¹³I pahn patohwanohng KAUN-O, meirong en wain, pwe I en kapingkalahngankihong eh ketin doareiehla.

¹⁴Nan pokon en sapwellime aramas akan koaros I pahn patohwanohng dahme I inoukidahr.

¹⁵Ia uwen toutoun kupwur en KAUN-O ni emen sapwellime aramas akan eh kin mehla!

¹⁶Maing KAUN, sapwellimomwi ladu ngehi, I kin papah komwi duwehte inei eh papah komwiher. Komw ketin doareielahr sang mehla.

¹⁷I pahn meirongkihong komwi meirong en kapingkalahngan oh pil kapakapohng komwi.

¹⁸I pahn patohwanohng komwi dahme I inoukidahr, mwohn pokon en sapwellimomwi aramas akan koaros, nan mwoalomwi nan Tehnpasomwi en Serusalem, Kapinga KAUN-O!

¹⁹I pahn patohwanohng komwi dahme I inoukidahr, mwohn pokon en sapwellimomwi aramas akan koaros, nan mwoalomwi nan Tehnpasomwi en Serusalem, Kapinga KAUN-O!