Read Pohnpeian Melkahka Kan 118 Bible Online

Melkahka Kan 118 - Pohnpeian bible

Melkahka Kan 118

¹Kumwail patohwanohng KAUN-O amwail kapingkalahngan, pwehki ih me kupwur mwahu, oh sapwellime limpoak me poatopoat.

²Mehn Israel kan en patohwan, “Sapwellime limpoak me poatopoat.”

³Sapwellimen Koht samworo kan en patohwan, “Sapwellime limpoak me poatopoat.”

⁴Koaros me kin kaudokiong en patohwan, “Sapwellime limpoak me poatopoat.”

⁵Nan ei apwal I ahpw likweriong KAUN-O; e ahpw ketin sapeng ie, oh ketin kasaledekihiehla.

⁶KAUN-O ketin ieiang ie, I sohte pahn masak mehkot; dahme aramas kak wiahiong ie?

⁷KAUN-O iei ih me kin ketin sewese ie, oh I pahn kilang duwen ei imwintihti kan ar pahn lohdi pahi.

⁸Me mwahu en likih KAUN-O sang koapworopworki aramas.

⁹Me mwahu en likih KAUN-O sang koapworopworki kaunen sampah kan.

¹⁰Imwintihti ngeder kapiliepenehr; ahpw sang ni manaman en KAUN-O I kamwomwiraillahr!

¹¹Re kapiliepene sang pali koaros; ahpw sang ni manaman en KAUN-O I kamwomwiraillahr!

¹²Re kapiliepene, rasehng mwuten loangalap, re ahpw mwadang lulda, rasehng kapakap en tuwi ieu; ahpw sang ni manaman en KAUN-O I kamwomwiraillahr.

¹³Re pelian ie ni kehlail, ngehi eri lohdier, ahpw KAUN-O ketin seweseiehda.

¹⁴KAUN-O me ketikihong ie manaman oh kehlail; ih me ketin doareielahr.

¹⁵Kumwail rong kadekedek en powehdi sang nan impwal en sapwellimen Koht aramas akan: “Sapwellimen KAUN-O manaman lapalap me wiadahr met!

¹⁶Manaman en nin lime me kahrehiong kitail en powehdi-% sapwellime manaman lapalap nan mahwen!”

¹⁷I sohte pahn mehla; ahpw I pahn momour oh lohkiseli dahme KAUN-O ketin wiadahr.

¹⁸E ketin kaloke ie mwuledek, ahpw e sohte ketin mweidohng I en mehla.

¹⁹Kumwail ritingadahng ie wenihmw kan en Tehnpaso; I en patohlong oh kapingkalahngan ong KAUN-O!

²⁰Ih wenihmwen KAUN-O met; me pwung kante me pahn pedolong.

²¹I patohwan kapinga komwi, Maing KAUN, pwehki omwi ketin karonge ie, pwehki omwi ketikihong ie manaman en powehdi.

²²Takai me sounkou ihmw kan kesepwekelahr uhd wiahla takaien pwukakeimw.

²³KAUN-O me ketin wiahda met; meid kapwuriamwei mehlel ong kitail.

²⁴Rahnwet iei rahnen KAUN-O eh ketin powehdi; kitail perenda, oh ngisingiski atail peren!

²⁵Komw ketin doareikitala, Maing KAUN, komw ketin doareikitala! Maing KAUN, komw ketin kupwurei kiht pwe se en pweida!

²⁶Koht en ketin kupwuramwahwih me kin patohdo ni mwaren KAUN-O! Sang ni Tehnpas en KAUN-O se patohwan kapaiakumwailda.

²⁷KAUN-O, iei Koht; e ketin kupwur mwahu ong kitail. Kumwail wahda tehnpaini kan oh tapihada sarawio oh kapar kapil pei sarawio.

²⁸Komwi me ei Koht, oh I kin patohwanohng komwi ei kapingkalahngan; I pahn lohkiseli sapwellimomwi roson lapalap.

²⁹Kumwail patohwan kapingkalahngan ong KAUN-O, pwehki ih me kupwur mwahu, oh sapwellime limpoak me poatopoat.