Read Pohnpeian Melkahka Kan 129 Bible Online

Melkahka Kan 129 - Pohnpeian bible

Melkahka Kan 129

¹Israel, ndadohng kiht mahs duwen omw imwintihti kan ar kalokeiuk sangete ni omw pwulopwul.

²“Sang ni ei pwulopwul ei imwintihti kan kalokehkin ie kalokolok mwuledek, ahpw re so mwahn kaloweiehdi.

³Re kalipwelipwehda tihnseweiet duwehla wasa me kin deideidahr ong wasahn poad wahnsahpw.

⁴Ahpw KAUN-O, ih me pwung, e ketin kasaledekihiehla sang nan mour en lidu.”

⁵Eri koaros me kin kailongki Saion re en lohdi oh tangdoaui.

⁶Irail koaros en duwehla dihpw me kin wosada pohn pwelengen ihmw, me kin mengila mwohn eh pahn laudla;

⁷me sohte me kin rikpene de wahsang.

⁸Sohte me kin keid limwah pahn nda, “KAUN-O en ketin kupwuramwahwih kumwail! Se kupwuramwahwih kumwail ni mwaren KAUN-O.”