Read Pohnpeian Melkahka Kan 132 Bible Online

Melkahka Kan 132 - Pohnpeian bible

Melkahka Kan 132

¹Maing KAUN, komw dehr ketin meliehla Depit oh soangen apwal akan koaros me lelohng ih.

²Maing KAUN, komw ketin tamanda dahme e patohwan inoukihong komwi, inowo me e patohwan wiahiong komwi, Wasa Lapalap, Koht en Seikop:

³“I sohte pahn pedolong nan imweio oh wendi nan kieio;

⁴I sohte pahn kommoal de meirla,

⁵I lao pahn diar wasa kis ong KAUN-O, tehnpas ehu ong Wasa Lapalap, Koht en Seikop.”

⁶Se rongehr duwen Kohpwahn Inowo, nan Pedleem, se ahpw diarada nan mohs en Searim.

⁷Se ahpw patohwan, “Kitail patolahng nan tehnpas en KAUN-O; kitail eri wia atail kaudok mwohn mwoale.”

⁸Maing KAUN, komw ketidohng nan Tehnpas Sarawio iangahki sapwellimomwi Kohpwahn Inowo, kilel en sapwellimomwi manaman, oh ketikette wasaht kohkohlahte.

⁹Sapwellimomwi samworo kan en wia dahme pwung ahnsou koaros; sapwellimomwi aramas koaros en ngisingiski ar peren!

¹⁰Komw ketin inoukihongehr sapwellimomwi ladu Depit; Maing KAUN, komw dehr soikeweisang rehmwi nanmwarki me komw ketin piladahr.

¹¹Komw ketin wiahiong Depit inou mehlel ehu-% inou ehu me komw sohte pahn ketin wekidala: “I pahn kasapwilada emen noumw pwutak kan en nanmwarki, oh e pahn kakaun mwurimw.

¹²Ma noumw pwutak kan pahn loalopwoatohng ei inou oh kosonned akan me I pahn kihong irail, eri, neirail seri kan pil pahn iang mwohd nan mwoahl wet kohkohlahte.”

¹³KAUN-O ketin piladahr Saion; e ketin kupwurki wiahki wasao tehnpese:

¹⁴“Iei wasaht me I pahn kin kousoan ie kohkohlahte; iei wasaht me I pahn kin kakaun wasa.

¹⁵I pahn kapaiahkihda Saion soangen kamwahu koaros me e kin anahne; I pahn kammedehkihla me semwehmwe kan kisin mwenge.

¹⁶I pahn kupwuramwahwih eh samworo kan ni arail wiewia kan koaros, oh aramas koaros en kokoul oh ngisngiski ar peren.

¹⁷Iei wasaht me I pahn kasapwilada emen kadaudok en Depit pwe en wiahla nanmwarki lapalap; oh I pahn kadakadaur manaman en nanmwrkio me I piladahr.

¹⁸I pahn kihong eh imwintihti kan nan kanamenek mwuledek, a eh wehi pahn paiamwahu oh pweida.”