Read Pohnpeian Melkahka Kan 135 Bible Online

Melkahka Kan 135 - Pohnpeian bible

Melkahka Kan 135

¹Kapinga KAUN-O! Kumwail kapinga mware, kumwail sapwellimen KAUN-O ladu kan,

²me kin iang papah nan tehnpas en KAUN-O, nan Tehnpas en atail Koht.

³Kumwail kapinga KAUN-O, pwehki ih me ketin kupwur mwahu; kumwail koul kapinga mware, pwehki ih me ketin kupwur kadek.

⁴E ketin pilada Seikop, oh aramas en Israel kan pwe en ketin sapwellimanikinirailla.

⁵I patohwan wehwehki me atail KAUN-O me lapalap, lapalapasang koht akan koaruhsie.

⁶E kin ketin wia mehkoaros me e kin kupwurki nanleng oh sampah, nansed oh nan kepin madau kan.

⁷E kin ketikihdo depwek en melimel sang ni imwin sampah; e kin ketin wiahda lioal en piripir nan melimel kan, oh kin ketikihdo kisinieng sang nan dewerail kan.

⁸E ketin kemehla mesenih koaros nan Isip, mesenih en aramas oh mahn akan.

⁹E ketin wiahda manaman oh soahng kapwuriamwei kei wasao pwe en ketin kaloke nanmwarkio oh sapwellime lapalap akan.

¹⁰E ketin kamwomwala wehi tohtohie oh kemehla nanmwarki kehlail kan:

¹¹Sihon, nanmwarkien mehn Amor kan, Ok, nanmwarkien Pasan, oh nanmwarki koaros nan Kenan.

¹²E ketikihong sapwarail ko ong sapwellime aramas ako; e ketikihong mehn Israel sahpw pwukat.

¹³Maing KAUN, se pahn kin wiahki komwi at Koht ahnsou koaros; dih koaros pahn kin tamataman komwi.

¹⁴KAUN-O pahn ketin doarehla sapwellime aramas akan; e pahn ketin kupwurehla sapwellime ladu kan.

¹⁵Koht en wehi kan kin wiawihkihda silper oh kohl; pehn aramas me kin wiairailda.

¹⁶Mie awarail, re ahpw sohte kak lokaia, mie masarail, re ahpw sohte kak kilang wasa.

¹⁷Mie salengarail, re ahpw sohte kak rong wasa; re pil sohte kak esingek.

¹⁸Irail kan koaros me wiairailda oh kin likih irail, re en duwehla dikedik en eni pwukat me re wiahda!

¹⁹Kapinga KAUN-O, kumwail aramas en Israel kan; kapinga ih, kumwail samworo en Koht kan!

²⁰Kapinga KAUN-O, kumwail mehn Lipai kan; kapinga ih, kumwail koaros me kin kaudokiong!

²¹Kapinga KAUN-O nan Saion, nan Serusalem, sapwellime mwoahl. Kapinga KAUN-O!