Read Pohnpeian Melkahka Kan 136 Bible Online

Melkahka Kan 136 - Pohnpeian bible

Melkahka Kan 136

¹Kumwail kapingkalahngan ong KAUN-O, pwehki ih me ketin kupwur mwahu; sapwellime limpoak me poatopoat.

²Kumwail kapingkalahngan ong Koht me keieu lapalapasang koht akan koaros; sapwellime limpoak me poatopoat.

³Kumwail kapingkalahngan ong kaun me keieu roson sang kaun akan koaros; sapwellime limpoak me poatopoat.

⁴Ihete me kin ketin wiahda manaman kupwuriamwei kan; sapwellime limpoak me poatopoat.

⁵Sapwellime erpit me e ketin wiahkihda nanleng; sapwellime limpoak me poatopoat.

⁶E ketin kauwada sampah pohn pihl loal akan; sapwellime limpoak me poatopoat.

⁷E ketin kapikada ketipin oh maram; sapwellime limpoak me poatopoat;

⁸ketipin mehn kakaun rahn akan; sapwellime limpoak me poatopoat;

⁹maram oh usu kan mehn kakaun nipwong; sapwellime limpoak me poatopoat.

¹⁰E ketin kemehla mesenih koaros nan Isip; sapwellime limpoak me poatopoat.

¹¹E ketin kahluwa mehn Israel ko sang Isip; sapwellime limpoak me poatopoat;

¹²ni roson oh manaman en nin lime; sapwellime limpoak me poatopoat.

¹³E ketin pwalangpeseng Sehd Weitahtao; sapwellime limpoak me poatopoat;

¹⁴e ketin kahluwa sapwellime aramas ako nansedo; sapwellime limpoak me poatopoat;

¹⁵e ahpw ketin kakihrala nanmwarkien Isip oh iangahki nah karis ko; sapwellime limpoak me poatopoat.

¹⁶E ketin kahluwa sapwellime aramas ako nan sapwtehn; sapwellime limpoak me poatopoat.

¹⁷E ketin kemehla nanmwarki kehlail kan; sapwellime limpoak me poatopoat;

¹⁸e ketin kemehla nanmwarki ndand kan; sapwellime limpoak me poatopoat;

¹⁹Sihon, nanmwarkien mehn Amor; sapwellime limpoak me poatopoat;

²⁰oh Ok, nanmwarkien Pasan; sapwellime limpoak me poatopoat.

²¹E ketikihong sapwarail ko ong sapwellime aramas ako; sapwellime limpoak me poatopoat;

²²E ketikihong Israel, sapwellime ladu; sapwellime limpoak me poatopoat.

²³E sohte ketin melieikitailla ni atail lohdi; sapwellime limpoak me poatopoat;

²⁴E ketin kasaledengkitailla sang atail imwintihti kan; sapwellime limpoak me poatopoat.

²⁵E kin ketikihong mehkoaros me momour kisin tungoal; sapwellime limpoak me poatopoat.

²⁶Kumwail kapingkalahngan ong Koht en nanleng; sapwellime limpoak me poatopoat.