Read Pohnpeian Melkahka Kan 14 Bible Online

Melkahka Kan 14 - Pohnpeian bible

Melkahka Kan 14

¹Me pweipwei kan kin mengimengloalki, “Sohte katepen Koht!” Irail koaros me suwedlahr, pwe re kin wiahda mehkan me suwehdie. sohte mehmen me kin wia me mwahu.

²KAUN-O kin ketin ireirong aramas akan sang nanleng pwe en mahsanih ma mie me loalokong, oh ma mie me kin kaudokiong ih.

³Ahpw irail koaros sapwungalahr, irail koaros me suwed. Sohte mehmen rehrail me kin wia me mwahu, sohte mwahn mehmen.

⁴KAUN-O ahpw ketin keinemwe, “Ia duwe, re sohte ese? Irail pwukat koaros me kin wia me suwed, re soaloalokong? Re kin momourki ar kin piripirapa nei aramas akan, oh re sohte kin kapakapohng ie.”

⁵Ahpw re pahn masepwehkada, pwehki Koht eh kin ketin ieiangih irail kan me kin peikiong.

⁶Me kin wia me suwed kan kin kapwowihala koasoandien aramas aktikitik kan, ahpw KAUN-O iei sileparail.

⁷Ia uwen ei kapakap pwe komourpen Israel en pwarodo sang Saion. Ia uwen peren me mehn Israel kan pahn wia ni ahnsou me KAUN-O pahn pwurehng kapaiairailda!