Read Pohnpeian Melkahka Kan 140 Bible Online

Melkahka Kan 140 - Pohnpeian bible

Melkahka Kan 140

¹Maing KAUN, komw ketin kapitiehla sang aramas suwed; komw ketin sileiesang sounkam aramas akan.

²Re kin koasoakoasone mehkot suwed ahnsou koaros, ahnsou koaros re kin kamwoarongehda aramas akan.

³Lowarail kan kin rasehng lowen sineik me kin kemehla aramas; arail lokaia kan rasehng pwoisen en sineik.

⁴Maing KAUN, komw ketin sileiesang manaman en aramas suwed kan; komw ketin sileiesang sounkam aramas akan me kin nannantihong pwe I en pwupwudi.

⁵Aramas aklapalap kei wiadahr arail mehn lidipih ie; re koasoanedier arail lidip kan limwahnial pwe re en lidipihiehdi.

⁶I ahpw patohwanohng KAUN-O, “Komwi me ei Koht.” Maing KAUN, komw ketin karonge ngilen ei pek sawas!

⁷Maing KAUN, Wasa Lapalahpie, soundoarepei roson, komwi me ketin sinsilei ie ni ahnsoun mahwen.

⁸Maing KAUN, komw dehr ketikihong aramas suwed kan dahme re kin anahne; komw dehr ketin mweidohng arail koasoandi kan en kin pweida.

⁹Komw dehr ketin mweidohng ei imwintihti kan en powehdi; komw kupwure pwe ar widing kan en pwurehng irail.

¹⁰Komw ketin kamwerediong pohrail mwoalus mwehl; oh re en lekdekiong nan ehu pwoahr loalen me re sohte kak kohda sang ie.

¹¹Irail kan me kin karaun likamw ong meteikan re en dehr kin pweida; oh me suwed en kin uhd kamwomwala sounkam aramas akan.

¹²Maing KAUN, I patohwan ese me komw kin ketin doarehla pwung en me semwehmwe kan oh pwung en me paisuwedlahr akan.

¹³Mehlel, aramas pwung kan pahn kapinga komwi; re pahn kin momour mwohn silangmwi.