Read Pohnpeian Melkahka Kan 142 Bible Online

Melkahka Kan 142 - Pohnpeian bible

Melkahka Kan 142

¹I likweriong KAUN-O pwehn ketin sewese ie; oh ngidingidki ei pekipek.

²I patohwanohng ei kaulim kan koaros; I patohwan wehkadahng ei apwal akan koaros.

³Ni ngeniet e mwoatohtalahr kowahlap, e mwahngih dahme konehng I en wia. Ei imwintihti kan ekihla lidip ehu mehn lidipihiehdi, nan ahl me I kin weweid ie.

⁴Ni ei kilikilengseli limwahi I kilang me sohte mehmen me kak sewese ie, sohte mehmen me kak sinsile ie. Sohte mehmen me kesempwal kin ie.

⁵Maing KAUN, I patohwan likweriong komwi pwe komwi en ketin sewese ie; komwi maing KAUN, iei komwi, me silepei; komwihte me I anahne nan mour wet.

⁶Komw ketin karonge ie ni ei pek sawas, pwe I kihrlahr nan apwal. Komw ketin doareiesang ei imwintihti kan; re me nohn kehlail sang ie.

⁷Komw ketin kasaledekihiehla sang nan ei pwunod akan; eri I ahpw pahn kapinga komwi ni pokon en sapwellimomwi aramas akan pwehki omwi ketin kupwur mwahu ong ie.