Read Pohnpeian Melkahka Kan 143 Bible Online

Melkahka Kan 143 - Pohnpeian bible

Melkahka Kan 143

¹Maing KAUN, komw ketin karonge ei kapakap! Komw ketin karonge ei pekipek ngidingid ni sapwellimomwi pwuhng; komw ketin sapeng ie ni loalopwoat!

²Komw dehr ketin kadeik ie, sapwellimomwi ladu menet; sohte emen me sohte dipe mwohn silangmwi.

³Ei imwintihtio koliedier oh poweiedier douluhl. E ahpw keseiehlong nan imweteng rotorot ehu, wasa I rasehngalahr me melahr akan kawao.

⁴Ngeniet mwoatohtalahr; oh I milahr nan pwunod laud.

⁵I tamataman rahn akan me samwalahr; I medemedewe duwen soahng koaros me komw ketin wiadahr, oh katamandohng ie wiepen nin limomwi kan koaros.

⁶I kapahda pehi kat ni ei kapakapohng komwi; ngeniet tihwohkinkomwilahr rasehngalahr pwehl madekeng e kin anahne pihl.

⁷Maing KAUN, komw ketin kupwure ie met! Solahr ei koapworopwor. Komw dehr ketin rirweisang ie, pwe I dehr iang irail kan me kin kohdihla nan sapwen me melahr akan.

⁸Komw ketin katamankin ie nimenseng koaros duwen sapwellimomwi limpoak poatopoat, pwe I kin koapworopworkin komwi. Ei tungoal kapakap akan kin kohdawohng rehmwi; komw ketin kasalehiong ie ahl me I pahn keid ie.

⁹Maing KAUN, I patohdo pahn kupwuromwi pwe komwi en ketin sinsilei ie; komw ketin kapitiehla sang ei imwintihti kan.

¹⁰Komwi me ei Koht; komw ketin padahkihong ie duwen ei pahn kapwaiada kupwuromwien. Komw ketin kupwur mwahu ong ie, oh kahluwa ie nan ahl me pwung.

¹¹Maing KAUN, komw ketin kapitiehla, nin duwen me komw ketin inoukidahr; sang ni sapwellimomwi kupwur mwahu komw ketin doareiesang nan ei apwal akan!

¹²Pwehki sapwellimomwi limpoak ong ie, komw ketin kemehla ei imwintihti kan oh ketin kamwomwala koaros me kin kaloke ie, pwe sapwellimomwi ladu ngehi.