Read Pohnpeian Melkahka Kan 146 Bible Online

Melkahka Kan 146 - Pohnpeian bible

Melkahka Kan 146

¹Kapinga KAUN-O! Ngeni, kapinga KAUN-O!

²I pahn kapinga KAUN-O erein ei mour; I pahn kokouliong ei Koht erein ei mour unsek.

³Kumwail dehr koapworopworki me lapalap en sampah kan; pwe sohte emen tohrohr kak komourkumwailla.

⁴Ni ar kin mehla, re kin pwurehng wiepwella; oh ni ahnsowohte, ar koasoandi kan kin imwisekla.

⁵Meid pai aramas me Koht en Seikop kin ketin sewese oh me kin koapworopworki KAUN-O eh Koht,

⁶sounkapikada nanleng, sampah, oh madau kan, oh audeparail kan koaros. E kin ketin kapwaiada sapwellime inou kan ahnsou koaros;

⁷e kin ketin sewese pwungen me toutoulahr akan oh kin ketin katungoale me duhpeklahr akan. KAUN-O kin ketin kasaledekala me sensel kan

⁸oh kin ketin kapehdpeseng mesen me maskun kan. E kin ketin pwekada me pwupwudi kan; e kin ketin poakohng sapwellime aramas pwung kan.

⁹E kin ketin sinsile mehn liki kan me kin kousoan nan sapwatail; e kin ketin sewese liohdi kan oh me sepwoupwou kan, a e kin ketin kauwehla koasoandien aramas suwed akan.

¹⁰KAUN-O pahn ketin nanmwarki kohkohlahte! Saion, omw Koht pahn kakaun kohkohlahte! Kapinga KAUN-O!