Read Pohnpeian Melkahka Kan 147 Bible Online

Melkahka Kan 147 - Pohnpeian bible

Melkahka Kan 147

¹Kapinga KAUN-O! Meid mwahu koulki melkahka en kaping ong atail Koht; meid kansenamwahu oh pwung kapinga ih.

²KAUN-O ketin onehda sapahl Serusalem; e ketin kasapahldohr me kalipilipala kan.

³E ketin kamwahwihalahr me nan kapehd ohlahr akan oh ketin kidimpenehr ar ohla kan.

⁴Ih me kin ketin koasoanehdi tohtohn usu kan oh ketikihong eden ehuehu usu.

⁵Atail Kaun me lapalap oh roson; sapwellime kupwurokong sohte kak sosohngdi.

⁶E kin ketin kasapwilada me aktikitik kan, eh ahpw kin ketin tiakdiong aramas suwed akan nanpwel.

⁷Kumwail koulki koulen kaping ong KAUN-O; kumwail kesengki arp ong atail Koht.

⁸E kin ketin kamwarakpeseng depwek kan pahnlahng; e kin ketin kamwerediong keteu pohn sampah oh kin ketin kawosehda dihpw pohn dohl akan.

⁹E kin ketikihong mahn akan arail kisin tungoal oh kin katungoale kisin menpihr kan ni ar kin sengisengki ar men mwenge.

¹⁰E sohte kin kupwurperenki kehlail en oahs akan, de kommwad en sounpei kan;

¹¹ahpw e kin kupwurperenki irail kan me kin wauneki, irail kan me kin koapworopworki sapwellime limpoak poatopoat.

¹²Serusalem, kapinga KAUN-O! Saion, kapinga omw Koht!

¹³E kin ketin silehdi mwahu omw ewen kehl kan; e kin ketin kupwuramwahwih noumw aramas akan.

¹⁴E kin ketin sinsile irepen omw wehi oh kin katungoalehkin kumwail pilawa me keieu mwahu.

¹⁵Ni eh kin ketin koasoanediong sampah mehkot, koasoandio kin mwadangete pweida.

¹⁶E kin ketin kadaridi sinoh duwehte pilangkes ehu oh kamwarak pwoaik rasehng pwelpar.

¹⁷E kin ketin kadaridi keteu aihs takai duwehte rakied; oh sohte me kakohng kepeu me e kin ketin kadarodo!

¹⁸Eri, e kin ketin mahsente, a ais kin peipeseng; e kin ketin kadar kisinieng, a pihl kin pwilipwiliwei.

¹⁹E kin ketin poahngokohng sapwellime aramas akan, sapwellime kaweid oh kosonned kan ong Israel.

²⁰E sohte ketin wiahiong met wehi teikan; re sohte ese sapwellime kosonned akan. Kapinga KAUN-O!