Read Pohnpeian Melkahka Kan 16 Bible Online

Melkahka Kan 16 - Pohnpeian bible

Melkahka Kan 16

¹Maing Koht, komw ketin sinsile ie, pwe komwihte me I kin koapworopworki.

²I kin patohwanohng KAUN-O, “Komwi me ei Kaun; soahng mwahu koaros me mie rehi kin pwilidohsang rehmwi.”

³Ia uwen mwahu en sapwellimen KAUN-O aramas loalopwoat kan! I kin perenki mehlel ieiang irail.

⁴Irail kan me kin pwahtiet idihdawehn koht teikan, re kin katohtowehla ar apwal akan. I sohte pahn iang irail nan arail meirong kan; I sohte pahn iang kaudokiong ar koht kan.

⁵Maing KAUN, komwihte kelehpw me I ahneki, oh komwi kin ketikihong ie mehkoaros me I kin anahne; oh komwi me kin ketin kolokol ei mour.

⁶Meid kapwuriamwei sapwellimomwi kisakis kan ong ie, ia uwen ar mwahu!

⁷I kin patohwan kapinga KAUN-O, pwehki eh kin ketin kaweid ie, oh ei pepehm pil kin katamankin ie nipwong.

⁸I kin aririh KAUN-O ahnsou koaros; e kin ketiket limwahi, oh sohte mehkot kak kauweiehla.

⁹Ihme kahrehda I kin diren kaping oh peren oh I kin pehm saledek sang apwal,

¹⁰pwe komw kin ketin sinsile ie sang manaman en mehla. I kin loalopwoat ni ei kin papah komwi, oh komwi sohte pahn ketin likidmelieiehla nan sapwen me melahr akan.

¹¹Komw pahn ketin kasalehiong ie ahl me kin kowohng mour; omwi kin ketiket rehi kin kadirekiniehla peren oh kahrehiong ie peren poatopoat.