Read Pohnpeian Melkahka Kan 17 Bible Online

Melkahka Kan 17 - Pohnpeian bible

Melkahka Kan 17

¹Maing KAUN, komw ketin karonge ei pekipeki pwuhng; komw ketin karonge ngilen ei likwer en pek sawas! Komw ketin karonge ei kapakap mehlel.

²Komw pahn ketin kadeikada ei pwung, pwehki omwi ketin mwahngih dahme pwung.

³Komw mwahngih mohngiongiet. Komw ketin pasehr rehi nipwong oh ketin kasawihadahr loalei unsek, komw ahpw sohte diarada ineng suwed ehu rehi. I sohte kin koasoi suwed,

⁴duwehte aramas teikan; I kapwaiadahr sapwellimomwi kosonned akan oh I sohte kin keid ni elen lemei.

⁵I kin weweid nan alomwi ahnsou koaros oh sohte kin katihasang.

⁶Maing ei Koht, I patohwan kapakapohng komwi, pwehki omwi kin ketin sapeng ie; eri komw ketin sohpeidohng ie oh karonge ei pato kat.

⁷Komw ketin kasalehda sapwellimomwi limpoak kapwuriamwei oh ketin doareiehla; pahn mwetehn limomwi I kin nekinekmwahu sang ei imwintihti kan.

⁸Komw ketin sinsile ie duwen omwi kin ketin sinsile pein silangmwien; komw ketin karirihiehla pahn mwetehn nin limomwi kan

⁹sang mwekid en aramas suwed kan. Imwintihti kamasepwehk kan kapiliepenehr.

¹⁰Sohte mahk mie rehrail oh re kin lokaiahn pohnmwahso.

¹¹Ahnsou wet re kapiliepenehr mwasamwasahn ahnsou koaros wasa I pahn sohpeila ie pwe re en kauweiehla.

¹²Re rasehng laion kei, me kin awiawih ie, pwe re en dapengiepeseng.

¹³Maing KAUN, komw ketidohla! Komw ketin pelianda ei imwintihti kan oh kaloweiraildi! Komw ketin doare kin ie sang aramas suwed kan sapwellimomwi kedlahs;

¹⁴doareiesang irail kan me kin ahneki mehkoaros me re inengieng nin sampah. Komw ketin kalokehkin irail kalokolok ko me komw ketin nekinekid ong irail; kalokolok kan en pil itarohng nair seri kan oh ekei en pil luhwehdi pwe en pil kohieng nein neirail seri kan.

¹⁵Ahpw ngehi, I pahn patohwan komwi, pwehki ei sohte wiahda mehkot sapwung; oh ni ei pahn pirda, roson en sapwellimomwi lingaling pahn kadirehkiniehla peren.