Read Pohnpeian Melkahka Kan 18 Bible Online

Melkahka Kan 18 - Pohnpeian bible

Melkahka Kan 18

¹Maing KAUN, ia uwen ei poakohng komwi! Komwi me soundoarepei.

²KAUN-O me silepei; ih me kelepei kehlail. Ei Koht me silepei, I kin nekinek mwahu pahn kupwure. E kin ketin pereiehla duwehte mehnsansar ehu; e kin ketin doareiehla oh kin ketin nekinekid ie.

³I kin likweriong KAUN-O, e ahpw kin ketin doareiesang ei imwintihti kan. Kapinga KAUN-O!

⁴Keper en mehla kapiliepenehr; iloak en meninkauwo koaduhpwalihiedier.

⁵Keper en mehla lelieier, oh sousou lidipiedier.

⁶Nan ei apwal I ahpw likweriong KAUN-O; I likwerih ei Koht pwe en ketin sewese ie. E ahpw ketin karonge ngilei nan tehnpese; e karongeier ei likwer en pek sawas.

⁷Sampah eri rerada oh itikekda; poahsoan en nahna kan ahpw mwekidida oh rerada, pwehki Koht ketin engiengdahr.

⁸Ediniei kusieisang nan sapwellime keinuhnu, mpwulen kisiniei oh mwoalus sang nan doauase.

⁹E ketin ritingada pahnlahng oh ketidihdo ket pohn depwek toantoal ehu.

¹⁰E ketin pihrdi ket pohn sapwellime kerup kei, e ketin pihrki pehnpihr en kisinieng.

¹¹E ketin perehkihla pein ih rotorot; depwek mosul kei, me diren pihl, kapilpene ih.

¹²Keteu aihs takai oh kisiniei kin mweremwerasang ni lioal me kin piripir mwowe oh kin pwar depwek toantoal kan.

¹³KAUN-O eri ketin kapitie laudida rasehng ngirisek en nahnsapwe sang pahnlahng; kapitien Wasa Lapalahpie ahpw sansalada.

¹⁴E ahpw ketin kadar sapwellime arep ko oh katangapeseng sapwellime imwintihti ko; e ahpw ketin pwakihkinirailla piripir en sapwellime lioal.

¹⁵Nan kepin madau sansalada, oh poahsoan en sampah kan iang pwarada, Maing KAUN, ni omwi ketin angiangihada sapwellimomwi imwintihti kan oh kapitie laudida nan omwi engieng.

¹⁶KAUN-O ahpw ketin kapadihdo lime sang nanleng oh ketin koliehda; oh ketin waikiehda sang nan kepin madau.

¹⁷E ketin kepitiesang ei imwintihti kehlail kan, oh sang irail koaros me kin kailongkin ie-% re me nohn kehlail sang ie.

¹⁸Re mahweniong ie ni ahnsou me I mihla nan apwal, ahpw KAUN-O ketin sileiehdi.

¹⁹E ketin seweseiehda nan ei apwal; e ketin doareiehla pwehki eh kupwurperenkin ie.

²⁰KAUN-O ketin katingih ie pwehki ei kin wia dahme pwung; e kin kupwuramwahwih ie pwehki eh sohte dipei.

²¹I peikiong kosonned en KAUN-O; I sohte sohpeisang ei Koht.

²²I kapwaiada sapwellime kosonned kan koaros; I sohte kauwehla sapwellime mahsen kan.

²³E mwahngih duwen ei mwakelekel, duwen ei kin kadohwansang ie wiewia sapwung kan.

²⁴Iei me e ketin katingih kin ie pwehki ei kin wia dahme pwung, pwe e ketin mwahngih duwen eh sohte dipei.

²⁵Maing KAUN, komw kin ketin loalopwoatohng irail kan me kin loalopwoatohng komwi; komw kin ketin kupwur mwahu ong irail kan me kin mwahu.

²⁶Komw kin kupwur mwakelekel ong irail kan me kin mwakelekel, ahpw kin kupwur toutou ong me suwed kan.

²⁷Komw kin ketin doarehla me aktikitik kan, oh kin ketin katikitikihala me aklapalap akan.

²⁸Maing KAUN, komw ketikihong ie marain; komw ketin kasarehsang ei rotorot.

²⁹Komw ketin kakehleiehda pwe I en mahweniong ei imwintihti kan oh ketikihong ie manaman pwe I en kak powehdi arail kelen mahwen kan.

³⁰Koht menet-ia uwen deilahn wiepen nin lime kan! Ia uwen likilik en sapwellime mahsen kan! E rasehng mehnsansar ehu ong irail kan me kin rapahki sileparail reh.

³¹KAUN-O kelehpw me Koht; Koht kelehpw me soundoarepatail.

³²Ih Kohto me kin ketin kakehlaiehda, me kin sinsile elei kan sang apwal akan.

³³E ketikihong ie nehi kat en marahra duwehte tie; e kin ketin sinsile ie pohn nahna kan.

³⁴E ketin kaiahneiedahng ni mahwen, pwe I en kak doadoahngki kesik ketieu me keieu kehlail.

³⁵Maing KAUN, komw kin ketin sinsile ie oh doandoare ie; sapwellimomwi sawas me kalinganeiehla, oh sapwellimomwi manaman me sinsile ie mwahu.

³⁶Komwi me ketin sileiehdi pwe I en dehr lohdi, oh I sohte mwahn pwupwudi.

³⁷I patohwan pwakihier ei imwintihti kan oh koliraildi; I sohte kin tokedi I lao kamwomwirailla.

³⁸I keseiraildi, re ahpw sohla kak uhda; re wonohnehr nanpwel mwohn meseiet.

³⁹Komwi me ketin kakehleiehda pwe I en kak mahwen oh ketikihong ie I en powehdi ei imwintihti kan.

⁴⁰Komwi me ketin kupwurehda ei imwintihti kan pwe re en kin tangasang ie; I kamwomwala irail kan me kin kailongkin ie.

⁴¹Re kin likwerih sawaseparail, ahpw sohte emen me kin doareirailla; re kin likweriong KAUN-O, ahpw e sohte kin ketin sapeng irail.

⁴²I tiakirailpeseng, re ahpw duwehla pwelpar me kisinieng kin ipirpeseng. I kin sok pohrail rasehng ei kin sok nan pwelmatak en nanial akan.

⁴³Komw ketin doareiesang nei aramas kahngohdi kan oh ketin kupwureiehla pwe I en wiahla kaunen wehi kan; aramas ekei me I sohte ese, met wialahr ei ladu.

⁴⁴Mehn liki kan kin poaridi mwohi; ni ar kin rong ngilei, re kin peikiong.

⁴⁵Re kin nan kapehd tikitikla oh rerrer kohieisang nan arail kelen mahwen kan.

⁴⁶KAUN-O ketin ieias! Kaping ong ei soundoar! Kumwail lohkiseli roson en Koht me ketin doareielahr.

⁴⁷Ih me ketin kupwurehda I en powehdi ei imwintihti kan; ih me ketin kalowediong wehi kan pahn ei manaman

⁴⁸oh ketin doareiesang ei imwintihti kan. Maing KAUN, komw me kin ketin kupwure ie pwe I en powehdi ei imwintihti kan, oh ketin silehsang ie aramas lemei kan.

⁴⁹I pahn kapinga komwi nanpwungen wehi kan; I pahn kokoulkihong komwi koulen kaping.

⁵⁰Koht ketikihong sapwellime nanmwarkio en kin powehdi; e ketin kasalehda sapwellime limpoak poatopoat ong me e ketin piladahro, ong Depit oh kadaudoke kan kohkohlahte.