Read Pohnpeian Melkahka Kan 2 Bible Online

Melkahka Kan 2 - Pohnpeian bible

Melkahka Kan 2

¹Dahme wehi kan koasoakoasone re en ketiwohkihla? Dahme aramas akan wiewiahki arail koasoandi so-katepe?

²Ar nanmwarki kan kahngohdilahr; ar kaun akan koasoakoasone nanpwungarail re en uhwong KAUN-O oh pil uhwong sapwellime nanmwarki me e ketin piladahr.

³Re ahpw nda, “Kitail kasaledengkitailla sang pahn ara kosonned, oh keseweisang kitail ara manaman.”

⁴KAUN-O ahpw ketin kiparamat sang nan mwoale nanleng, oh ketin kumwuski arail koasoandi kan.

⁵Ih eri ketin engiengda oh mahseniong irail, oh kamasangkinirailda sapwellime engieng.

⁶E ketin mahsanih, “I kasapwiladahr nei nanmwarki pohn ei dohl sarawio Saion.”

⁷Nanmwarkio ahpw mahsanih, “I pahn kasalehda dahme KAUN-O ketin mahsanih. KAUN-O mahsanihong ie: ‘Kowe nei pwutak; rahnwet I wialahr semomw.

⁸Peki rehi, a I pahn kihong uhk wehi kan koaros; oh ke pahn limankihla sampah pwon.

⁹Ke pahn kauwehkinirailla sokon mete; ke pahn kamwereirailpeseng duwehte omw kin pwalangpeseng dahl pleit.’ ”

¹⁰Eri, kumwail nanmwarki kan, kumwail rong ie; kumwail kaunen sampah kan, kumwail rong duwen met:

¹¹Kumwail papah KAUN-O ni lammwin; kumwail rerrer

¹²oh poaridihsang; pwe e dehr ketin mwadang engiengda, oh kumwail pahn mwadangete mehkihla. Meid pai irail koaros me kin wiahki KAUN-O sileparail.