Read Pohnpeian Melkahka Kan 20 Bible Online

Melkahka Kan 20 - Pohnpeian bible

Melkahka Kan 20

¹KAUN-O en kin sapeng omwi kapakap ni ahnsoun omwi apwal! Koht en Seikop en kin ketin sinsile komwi.

²En ketin kadarodohng komwi sawas sang nan Tehnpese oh kin ketin sewesei komwi sang pohn Nahna Saion.

³En ketikihda omwi meirong kan koaros, oh kupwurperenki omwi meirong en mahn akan koaros.

⁴En ketikihong komwi dahme komw kin inengieng oh kupwure pwe omwi koasoandi kan koaros en pweida.

⁵Eri iei duwen atail pahn ngisingiski atail perenkihda omwi powehdi oh pil kapikapingahki atail Koht. KAUN-O en ketin kupwurehla omwi pekipek kan koaros.

⁶Met I patohwan eseier me KAUN-O ketikihongehr manaman en powehdi ong sapwellime nanmwarki me e ketin piladahro; e ketin sapeng ih sang nan sapwellime mwoahl sarawien nanleng oh sang ni sapwellime manaman e kin ketikihong pwe en powehdi nan mahwen tohto.

⁷Ekei kin likihala wararail werennansapw en mahwen kan, ekei dakeparail oahs akan, ahpw kitail kin likih manaman en KAUN-O atail Koht.

⁸Soangen aramas pwukat pahn dipekelekel oh pwupwudi, ahpw kitail pahn uhda oh uh tengeteng.

⁹Maing KAUN, komw ketikihong at nanmwarki en powehdi; komw ketin sapeng kiht ni at kin patohwan likweriong komwi.