Read Pohnpeian Melkahka Kan 21 Bible Online

Melkahka Kan 21 - Pohnpeian bible

Melkahka Kan 21

¹Maing KAUN, at tungoal nanmwarki kupwurpereperen, pwehki roson me komw ketikihong; e ketin pereperenki omwi ketin kupwurehda pwe en powehdi.

²Komw ketikihongehr anahn en kupwure; komw ketin sapengehr sapwellime pekipek.

³Komw ketidohngehr reh oh ketikihongehr kupwuramwahu tohto oh ketikidiongehr pohn tapwi nihn kohl ehu.

⁴E patohwan peki rehmwi mour, a komw ahpw ketikihongehr, mour werei oh poatopoat.

⁵Lingan en mware me lapalap pwehki sapwellimomwi sawas; komwi ketikihong ih ndand oh roson.

⁶Sapwellimomwi kapai kan kin ieiang ih kohkohlahte, oh omwi kin ketin ieiang ih kin kaparanda.

⁷Nanmwarkio kin likih KAUN-O, Wasa Lapalap; oh pwehki sapwellimen KAUN-O limpoak poatopoat e pahn kin koapworopwor oh saledek ahnsou koaros.

⁸Nanmwarkio pahn ketin kalowehdi sapwellime imwintihti kan koaros; oh e pahn ketin salihedi koaros me kin kailongki.

⁹E pahn ketin kamwomwirailla duwehte kisiniei mwehl ni eh pahn ketin pwarada mwohn masarail kan. KAUN-O pahn ketin kasohreirailla nan sapwellime engieng oh kisiniei pahn kamwasikeirailla.

¹⁰Sohte emen kadaudokarail pahn pitla. nanmwarkio pahn kemehla irail koaros.

¹¹Re kin wia ar koasoandi kan, koasoandi suwed en uhwong ih, ahpw re sohte pahn pweida.

¹²E pahn ketin kasikihkin irail sapwellime arep oh pahn kahrehiong ar pweiekla oh tangdoaui.

¹³Maing KAUN, se patohwan kapinga komwi, pwehki sapwellimomwi roson lapalap! Se pahn koul oh kapinga sapwellimomwi manaman.