Read Pohnpeian Melkahka Kan 25 Bible Online

Melkahka Kan 25 - Pohnpeian bible

Melkahka Kan 25

¹Maing KAUN, I kin kapakapohng komwi;

²Maing ei Koht, komwi me I kin likih. Komw ketin doareiesang kanamenekpen ei lohdi; komw dehr mweidohng ei imwintihti kan re en kepitkin ie!

³Me kin likih komwi sohte kin lohdi, ahpw me kin kahngohdiong komwi, iei irail me kin lohdi.

⁴Maing KAUN, komw ketin padahkihong ie, oh kasalehiong ie sapwellimomwi ahl akan.

⁵Komw ketin padahkihong ie duwen ei pahn momourki sapwellimomwi mehlel, pwe komwi me ei Koht, komwi me ketin doareiehla. I kin likih komwi ahnsou koaros.

⁶Maing KAUN, komw ketin tamanda sapwellimomwi kalahngan oh limpoak poatopoat, me komw ketin kasaledahr sang nin tepin kawa.

⁷Komw ketin mahkikihong ie dipei oh ei sapwung kan en ni ei pwulopwulo. Maing KAUN, komw ketin tamankin ie sapwellimomwi limpoak poatopoat oh kalahngan.

⁸Pwehki KAUN-O eh pwung oh mwahu, e kin ketin padahkihong me dipan akan ahl me re en weweid ie.

⁹E kin ketin kahluwa me aktikitik kan nan ahl pwung oh kin ketin padahkihong irail kupwure.

¹⁰Ni sapwellime limpoak oh loalopwoat e kin ketin kahluwa irail koaros me kin kapwaiada sapwellime inou oh peikiong sapwellime kosonned akan.

¹¹Maing KAUN, komw ketin kapwaiada omwi inowo, oh ketin mahkikihong ie dipei kan, pwe dipei kan me ngeder.

¹²Irail kan me kin wauneki KAUN-O pahn ese sang reh ahl me re pahn weweid ie.

¹³Re pahn kin paiamwahu ahnsou koaros, oh nair seri kan pahn sapweniki sahpwo.

¹⁴KAUN-O kin ketin kompoakepahniki irail kan me kin peikiong, oh e kin ketin katengehdi ong irail sapwellime inou.

¹⁵I kin rapahki sawasepei rehn KAUN-O ahnsou koaros, e ahpw kin ketin kapitiesang wasa keper.

¹⁶Maing KAUN, komw ketin sohpeidohng ie oh kupwurkalahngan ong ie, pwe I kelehpwlahr oh I me luwet.

¹⁷Komw ketin kamaiawihiehda sang nan ei pwunod akan oh ketin doareiesang nan ei apwal akan koaros.

¹⁸Komw ketin kupwurehla ei pahtou oh lokolok oh ketin mahkikihong ie dipei kan koaros.

¹⁹Komw mahsanih uwen ngeder en ei imwintihti kan; oh uwen ar kin kailongkin ie!

²⁰Komw ketin sinsile ie oh doareiehla; komw ketin sinsile ie pwe I en dehr lohdi. I kin rapahki poadoarepei sang rehmwi.

²¹Ei poadidi oh pwung en sinsile ie, pwehki ei kin patohwan likih komwi.

²²Maing Koht, komw ketin doarehla sapwellimomwi aramas akan en Israel, sang nan ar apwal akan koaros!