Read Pohnpeian Melkahka Kan 29 Bible Online

Melkahka Kan 29 - Pohnpeian bible

Melkahka Kan 29

¹Kapinga KAUN-O, kumwail sapwellimen Koht kan me pato pahnlahng; kumwail kapinga sapwellime lingan oh manaman.

²Kumwail kapinga mwar lingaling en KAUN-O; kumwail poaridihsang Me Sarawio ni eh pahn ketin pwarodo.

³Kapitien KAUN-O peipeido sang pohn pihl akan; Koht lingaling wie ngirisek rasehng nansapwe, kapitie ikiparpesengehr pohn madau.

⁴Kapitien KAUN-O me manaman. Kapitien KAUN-O me diren roson.

⁵Kapitien KAUN-O kin karaukehdi tuhke sidar kan, oh pil tuhke sidar kan en Lepanon.

⁶E ketin kalusseli nahna kan en Lepanon rasehng koupwul kan oh kalus nahna Ermon rasehng kouwol pwulopwul men.

⁷Kapitien KAUN-O kin kahrehda lioal eh kin piripir.

⁸Kapitie kin kahrehda rerrer en nan sapwtehn; e kin itikada sapwtehn en Kades.

⁹Kapitien KAUN-O kin itikada tuhke lap akan en nanwel, oh kin kamwerehsang tehn tuhke kan, nindokon aramas koaros me pato nan Tehnpaso kin weriwerki, “Kaping ong Koht!”

¹⁰KAUN-O kin ketin kakaun pihl loal akan; e kin ketin kakaun nin duwen nanmwarki men kohkohlahte.

¹¹KAUN-O kin ketin kakehlahda sapwellime aramas akan oh kupwuramwahwih kin irail popohl.