Read Pohnpeian Melkahka Kan 31 Bible Online

Melkahka Kan 31 - Pohnpeian bible

Melkahka Kan 31

¹Maing KAUN, I patohdo pahn kupwuromwi pwe komwi en ketin sinsile ie; komw dehr ketin mweidohng ie I en lohdi. Komwi Koht pwung men; I peki komwi en ketin doareiehla!

²Komw ketin karonge ie! Komw ketin doare ie ahnsou wet! Komw ketin wiahla ei wasahn ruk pwe komwi en ketin sinsile ie; komw ketin wiahla kelepei, oh ketin doareiehla.

³Komwi me ei wasahn ruk oh doarepei; komw kaweid ie oh kahluwa ie nin duwen me komw ketin inoukidahr.

⁴Komw ketin sileiesang nan lidip me re wiahiongieier; komw ketin pereiesang nan keper.

⁵I kin mweidohng pein ngehi nin limomwi kan. Maing KAUN, komw pahn ketin doareiehla, pwe komwi Koht loalopwoat emen.

⁶Komwi kin ketin kalahdeki irail kan me kin kaudokiong koht likamw akan, a ngehi I kin likih komwi.

⁷I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.

⁸Komw sohte ketin mweidohng ei imwintihti kan en koliehdi; komw ketikihongieier saledek en patohseli wasa kan me I anahne.

⁹Maing KAUN, komw ketin kupwure ie, pwe I milahr nan apwal; nan poaren mesei kat tihwokilahr ei kin sengiseng; I weikeklahr mehlel.

¹⁰Solahr angi pwehki ei nsensuwed, oh sengiseng kamwotelahr mouri. I luwetkilahr ei apwal akan koaros, pil tih kat wie luhluwetala.

¹¹Ei imwintihti kan koaros, ahpw mehlel mehn mpei kan, kin mwamwahlikin ie. Irail kan me kin ese ie re masakielahr; ni ar kin kilang ie nanial, re kin tangdoaui.

¹²Aramas koaros manokeielahr, duwehte ngehi aramas mehla men, I rasehng mehkot mwahl me aramas keselahr.

¹³I kin rong mwenginingin en ei imwintihti tohto; kamasepwehk kin kapikapil ie! Re wie lamalamki ar pahn uhwong ie, re koasoakoasone duwen ar pahn kemeiehla.

¹⁴Ahpw Maing KAUN, I kin likih komwi; komwi me ei Koht!

¹⁵I kin patopato ni epwelipen nin limomwi kan ahnsou koaros; komw ketin doareiehla sang rehn ei imwintihti kan, oh pil sang irail kan me kin kaloke ie.

¹⁶Komw ketin mahsanih sapwellimomwi ladu menet ni kupwur kalahngan; komw ketin doarehkiniehla sapwellimomwi limpoak poatopoat.

¹⁷Maing KAUN, I kin likweriong komwi; komw dehr ketin mweidohng ie I en namenekla. Aramas suwed kan en namenekla; re en nennenla oh kohdilahng nan sapwen me melahr akan.

¹⁸Komw ketin katokehdi me likamw akan, irail koaros me aklapalap oh kahngohdi, me kin mwamwahliki me pwung kan.

¹⁹Meid kapwuriamwei soangen mwahu kan me komwi ketin nekinekidohng irail me kin wauneki komwi! Aramas koaros patohwan ese duwen omwi kupwur mwahu, ia uwen mwahu en omwi kin ketin sinsile irail kan me kin likih komwi.

²⁰Komw kin ketin karukihirailla mwohn silangmwi sang koasoandien aramas akan; komw kin ketin pereirailla wasa mwahu sang lokaia suwed en ar imwintihti kan.

²¹Kapinga KAUN-O! Ia uwen kapwuriamwei en eh ketin kasalehda sapwellime limpoak ong ie ni ei imwintihti kan ar kapiliepene oh mahweniong ie!

²²I masepwehkada, I ahpw lemeleme me e ketin keseielahr sang mwohn silangi. Ahpw soh, pwe e ketin karonge ei likwer, ni ei patohwan peki sawasepei sang reh.

²³Kumwail poakohng KAUN-O, kumwail koaros sapwellime aramas loalopwoat akan! KAUN-O kin ketin sinsile me loalopwoat akan, e ahpw kin ketin kaloke me aklapalap akan.

²⁴Kumwail koaros me kin koapworopworki KAUN-O, kumwail kehlail oh kommwad.