Read Pohnpeian Melkahka Kan 33 Bible Online

Melkahka Kan 33 - Pohnpeian bible

Melkahka Kan 33

¹Kumwail koaros me pwung kan, kumwail perenkihda wiepen nin limen KAUN-O; kumwail kan me kin peikiong, kumwail kapinga KAUN-O!

²Kumwail kapingahki KAUN-O noumwail keseng kan, kumwail kouliong sang ni selen noumwail arp kan.

³Kumwail tiakada apwoat koul kapwen. koulki ni ngihl kaselel sang ni noumwail keseng kan oh ngisingiski amwail peren!

⁴Mahsen en KAUN-O me mehlel, oh sapwellime pwuhng kin dehde ni wiepen nin lime kan koaros.

⁵KAUN-O kin ketin poakohng me pwung oh me mehlel, oh sampah direkilahr sapwellime limpoak poatopoat.

⁶Nanleng wiawihkihda mahsen en KAUN-O, eh mahsen me pil wiahda ketipin, maram oh usu kan.

⁷Eh ketikipene pilen madau koaros wasahtehkis; e ketin kelepene kepin madau kan nan imwen nahk kan.

⁸Kumwail tohn sampah koaros, kumwail kaudokiong KAUN-O! Kumwail aramas en sampah pwon, kumwail wauneki KAUN-O!

⁹Ni eh ketin mahsente, sampah ahpw kepikipikda; ni eh ketin poahngok mehkoaros ahpw pwarada.

¹⁰KAUN-O kin ketin kapwowiala koasoandien wehi kan; e kin ketin kasohrehla lamalam en aramas akan.

¹¹A sapwellime koasoandi kan kin mihmi poatopoat, koasoandi kan en nan kupwure kin duweduwehte erein dih koaros kohkohlahte.

¹²Meid pai wehi me eh Koht, iei KAUN-O; meid pai aramas akan me e ketin piladahr pwe en sapwellimanikihla!

¹³KAUN-O kin ketin kaikairoir sang nanleng, oh kin mahsanih aramas koaros.

¹⁴Sang nan mwoale ileilehie e kin ketin ireirong aramas koaros me kin kousoan nin sampah.

¹⁵Ih me kin ketin wiahda audepen kapehdirail kan koaros, oh kin mwahngih ar wiewia kan koaros.

¹⁶Sohte nanmwarki men kin powehkihdi kehlail en sapwellime karis; sohte sounpei men kin powehkihdi eh kommwad nan mahwen.

¹⁷Oahs akan en nan mahwen pil sohte kateparail ong powehdi; ar kehlail mehlel sohte kak doareirailla.

¹⁸KAUN-O kin ketin sinsile irail me kin peikiong, irail kan me kin likih sapwellime limpoak poatopoat.

¹⁹E kin ketin doareirailla sang mehla; e kin ketin komokomour irail ni ahnsoun lehk.

²⁰KAUN-O, me atail koapworopwor; ih me silepatail oh sawasepatail.

²¹Kitail kin pereperen pwehki ih; kitail kin likih sapwellime mwar sarawi.

²²Maing KAUN, sapwellimomwi limpoak poatopoat en ketiket reht, ni at kin patohwan koapworopworkin komwi.