Read Pohnpeian Melkahka Kan 34 Bible Online

Melkahka Kan 34 - Pohnpeian bible

Melkahka Kan 34

¹I pahn patohwan kapingkalahngan ong KAUN-O ahnsou koaros; I sohte pahn tokedihsang ei kapikapinga.

²I pahn kin patohwan kapingahki wiepen nin lime kan; kumwail me toutoulahr akan, kumwail rong oh nsenamwahula!

³Kumwail iang ie lohkiseli roson lapalap en KAUN-O; kitail wiakihteieu kapinga mware!

⁴I kapakapohng KAUN-O, e ahpw ketin sapeng ie; e ketin kasaledekihiehla sang nan ei masak koaros.

⁵Me toutoulahr akan kin sohpeiong oh kin nsensenamwahu; re sohte pahn nsensuwedla.

⁶Me sohte sawaseparail akan kin likweriong, oh e kin ketin sapeng irail; e kin ketin doareirailla sang ar apwal akan koaros.

⁷Sapwellime tohnleng kin sinsile irail kan me kin wauneki KAUN-O, oh kin kapitirailsang soahng keper kan.

⁸Kumwail pein rapahki ia uwen kalahngan en KAUN-O. Meid pai irail kan me kin diar sileparail pahn kupwure.

⁹Kumwail sapwellime aramas akan koaros, kumwail wauneki KAUN-O, irail koaros me kin peikiong pahn ahneki soahng koaros me re anahne.

¹⁰Laion kan pil kin duhpengkihla eh sohte mwenge, ahpw irail kan me kin peikiong KAUN-O, sohte pahn luhs sang mehkot mwahu.

¹¹Kohdo, kumwail kompoakepahi pwulopwul kan, oh rong ie, pwe I pahn padahkihong kumwail duwen wauneki KAUN-O.

¹²Kumwail men nsenamwahu nan amwail mour? Kumwail anahne mour werei oh nsenamwahu?

¹³Eri, kumwail dehr lokaia suwed, oh dehr lokaia likamw.

¹⁴Kumwail sohpeisang me suwed oh wiahda me mwahu; kumwail nantihong kolokol popohl ni mohngiong unsek.

¹⁵KAUN-O kin ketin sinsile me pwung kan oh kin ketin karonge ar likwer kan.

¹⁶E kin ketin pelian irail kan me kin wia me suwed, eri re pahn manoknokla ni ar pahn mehla.

¹⁷Me pwung kan kin likweriong KAUN-O oh e kin ketin karonge irail; e kin ketin kapitirailsang nan arail apwal akan koaros.

¹⁸KAUN-O kin ketiket mpen irail me nan kapehd tikitikilahr; oh kin ketin doarehla irail kan me kin sohla ar koapworopwor.

¹⁹Apwal tohto kin lelohng aramas mwahu men, ahpw kAUN-O kin ketin doarehsang nan eh apwal akan koaros;

²⁰KAUN-O kin ketin sinsile, sohte tih pwoat reh me timpeseng.

²¹Mehkot suwed pahn kemehla aramas suwed kan; irail kan me kin kailongki me pwung kan pahn ale lokolok.

²²KAUN-O pahn ketin doarehla sapwellime aramas akan; irail kan me kin patohla reh pwe en ketin sinsile irail pahn mourla.