Read Pohnpeian Melkahka Kan 35 Bible Online

Melkahka Kan 35 - Pohnpeian bible

Melkahka Kan 35

¹Maing KAUN, komw ketin uhwong irail kan me kin uhwong ie, oh ketin angiangih irail kan me kin men peiong ie.

²Komw ketikihda sapwellimomwi mehnsansar oh tehtehn peien oh ketido doareiehla.

³Komw ketikihda sapwellimomwi ketieu oh sile en mahwen oh uhwong irail kan me kin pwakipwakih ie. Komwi en inoukihong ie me komwi pahn doareiehla.

⁴Irail kan me kin nannantihong re en kemeiehla re en lohdi oh namenekla! Irail kan me kin koasoakoasone re en uhwong ie re en sarohdi oh pingida!

⁵Re en rasehng dipw meng me kisinieng kin ipirseli nindokon tohnleng en KAUN-O eh pahn pwakihirailpeseng!

⁶Alarail en rotala oh likekirisla, nindokon tohnleng en KAUN-O eh pahn kamwomwirailla!

⁷Re koasoanediong ie lidip ni so kahrepe oh weirada pwoahr loal ehu pwe re en koliehdi.

⁸Ahpw paisuwed en kamwomwmwomwla pahn lel irail ni arail sasairki; re pahn pein lohdiong nan arail lidip oh pwupwudi oh mwomwla.

⁹Eri, I pahn nsenamwahu pwehki KAUN-O; I pahn pereperen pwehki eh ketin doareiehla.

¹⁰I pahn patohwanohng KAUN-O sang loalei unsek, “Maing, sohte emen me duwehte komwi. Komw kin ketin silehsang me luwet akan me kehlail kan, me semwehmwe kan sang me kin kaloke irail akan.”

¹¹Aramas suwed kan kin karaunlikamw ong ie oh kadipahkin ie dihp toutou kei me I so mwahn ese.

¹²Re kin dupungki ei wiewia mwahu me suwed, ngehi eri kin nan kapehd tikitikla.

¹³Ahpw ni ar soumwahuda, I pwuhriong nan likoun nsensuwed; oh pein kalokehkin ie kaisihsol; I kin poaridi wia ei kapakap,

¹⁴duwehte ei kin kapakapki kompoakepahi men de riei men. I kin kokohseli oh koskipene nsensuwed, duwehte emen me kin nsensuwedki kapilsalehdalahn ine.

¹⁵Ahpw nan ei apwal, re perenda oh keidohng mpei pwe re en kapailokei ie; mehn liki kan keme ie oh sohte tokedihsang wokiwokih ie.

¹⁶Re kangkakil ie masarail kan diren kailok, duwehte aramas me kin kouruhrki me nehtuk men.

¹⁷Maing KAUN, ia erein omwi pahn mamahsanihte? Komw ketin kapitiesang ar tiahk suwed kan; komw ketin doarehla ei mour sang laion pwukat.

¹⁸I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.

¹⁹Komw dehr mweidohng ei imwintihti kan, aramas likamw pwukan, en pereperenki ei lohdi. Komw dehr mweidohng irail kan me kin kailongkin ie ni so kahrepe, re en perenki ei pahtoulahr.

²⁰Re sohte kin mwomwen lokaia kadek; ahpw ihte re kin kinehda soangen likamw koaros duwen aramas akan me kin ngoangki meleilei oh popohl.

²¹Re kedipa ie ni ngihl laud, ketihtihki, “Se kilang dahme ke wia!”

²²Ahpw komwi, Maing KAUN, komwi me ketin mahsaniher met. Eri, Maing KAUN, komw dehr ketin nennenla; komw dehr ketin dohweisang ie!

²³Maing KAUN, komw ketida oh ketin doareiehla; ei Koht, komw ketida oh ketin sewese ie nan ei kopwung.

²⁴Maing KAUN, komwi me pwung, komw ketin kalohkihda duwen eh sohte dipei; komw dehr ketin mweidohng ei imwintihti kan en kepitki ei apwal.

²⁵Komw dehr ketin mweidohng re en ndinda, “Kitail piseksangehr! Ih me kitail mwauhki!”

²⁶Eri, irail kan me kin kepitki ei lokolok; re en lohdi oh pingida. Irail kan me kin kahski dene re mwahu sang ie re en namenekla oh sarohdi.

²⁷Ahpw irail kan me men kilang pwungla mwahu en ei kopwung re en ngisingiski arail peren oh kapwukapwurehiong koasoi pwoatet, “Ia uwen lapalap en KAUN-O! Eh kin ketin kupwurperenki pweidahn sapwellime ladu.”

²⁸I ahpw pahn patohwan lohkiseli sapwellimomwi pwung, oh pahn kin kapinga komwi sang nimenseng lel nipwong.