Read Pohnpeian Melkahka Kan 36 Bible Online

Melkahka Kan 36 - Pohnpeian bible

Melkahka Kan 36

¹Dihp kin momour loalen aramas suwed; aramas suwedo kin soikala Koht oh sohte kin wauneki.

²Pwehki eh kin wiahki pein ih mehkot, e kin lemeleme me Koht sohte pahn diar dipe oh kalokehki.

³Eh koasoi kan me suwed oh diren likamw; e solahr kin wia dahme mwahu oh pwung.

⁴E kin wiahda koasoandi suwed kei nindokon eh kin wonohn nan dewe; e sohte kin wia mehkot mwahu, oh sohte suwed ehu e kin soikala.

⁵Maing KAUN, sapwellimomwi limpoak poatopoat kin leldalahng nanleng; sapwellimomwi loalopwoat kin kipe pahnlahng.

⁶Sapwellimomwi pwung inenen ileile duwehte nahna kan; sapwellimomwi kadeik loal duwehte loalen nan madau. Komw kin ketin apwahpwalih aramas akan oh mahn akan.

⁷Maing Koht, ia uwen kesempwal en sapwellimomwi limpoak poatopoat! Se kin diar silasil pahn mwetehn nin limomwi kan.

⁸Se kin kamadipwki kisin tungoal koaros me komw kin ketikihda; komw kin ketin mweidohng kiht se en kin nimpil sang ni pilen sapwellimomwi kalahngan.

⁹Komwi me poahsoan en mour koaros, oh pwehki sapwellimomwi marain se kin kak patohwan marain.

¹⁰Komwi ketin dadaurete sapwellimomwi limpoak ong irail kan me kin patohwan esei komwi oh ketin wia me mwahu ong me pwung kan.

¹¹Komw dehr ketin mweidohng me aklapalap akan en mahweniong ie de aramas suwed kan en kahrehda ei pahn sopohla.

¹²Kumwail kilang wasa me aramas suwed kan pwupwudiong ie. Re wonohnehr wasao sohte kak pwourda.