Read Pohnpeian Melkahka Kan 37 Bible Online

Melkahka Kan 37 - Pohnpeian bible

Melkahka Kan 37

¹Ke dehr pwunodki aramas suwed akan; ke dehr pil peirinki paien irail me kin wiahda me sapwung.

²Re pahn mwadang sohrala duwehte dihpw me mengila; re pahn mehla rasehng kisin tuhke me kin mengidi.

³Likih KAUN-O, oh wiahda tiahk mwahu, ke ahpw pahn koukousoan nan sahpwo oh sohte perki mehkot.

⁴Rapahki omw peren rehn KAUN-O; oh e ahpw pahn ketikihong uhk dahme ke keieu inengieng.

⁵Mweidohng KAUN-O pein kowe; likih, e ahpw pahn seweseiuk.

⁶E pahn kupwurehda pwe omw wiewia pwung kan en lingalingla duwehte ketipin.

⁷Kanengamahiong oh awiawih dahme KAUN-O pahn ketin wia; ke dehr pwunodki paiamwahulahn meteikan de pil irail me kin pweida nan ar koasoandi suwed kan.

⁸Ke dehr pwunod de lingeringer; pwe met pahn kahrehiong uhk nan apwal.

⁹Irail kan me kin likih KAUN-O pahn sapweniki sahpwo, a aramas suwed kan pahn koakoahksang.

¹⁰Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail;

¹¹a me aktikitik kan pahn sapwenikihla sahpwo oh re pahn paiamwahu oh popohl.

¹²Aramas suwed kin wia koasoandi me kin uhwong aramas mwahu oh re kin kangkakil kin irail ar kailok.

¹³Ahpw KAUN-O kin ketin kiparamatki aramas suwed kan, pwe e mwahngih me re kereniongehr kamwomwla.

¹⁴Aramas suwed kan kin ngapkipeseng nair kedlahs oh kosepene nair ketieu, pwe re en kemehla me semwehmwe oh paisuwed kan, oh en kemehla irail kan me kin wia me mwahu;

¹⁵ahpw re pahn mehkihla pein nair kedlahs akan, oh nair kesik ketieu kan pahn timpeseng.

¹⁶Mehnda ma en aramas mwahu men eh dipwisou me tikitik, ahpw e kesempwalasang en aramas suwed koaros ar kepwehpwe,

¹⁷pwehki KAUN-O pahn ketikihsang kehlail en aramas suwed kan, e ahpw pahn ketin sinsile me mwahu kan.

¹⁸KAUN-O kin ketin apwalih irail me kin peikiong, oh irail pahn sapwenikihla sahpwo kohkohlahte.

¹⁹Re sohte pahn lokolok ni ahnsou apwal; pwe ar dipwisou pahn itar ni ahnsoun lehk.

²⁰Ahpw aramas suwed akan pahn mehla; imwintihti en KAUN-O kan pahn sohrala rasehng wahn rohs en nanwel akan; re pahn sohrala duwehte ediniei.

²¹Aramas suwed akan kin pweipwand, ahpw sohte kin kapwungala, a aramas mwahu kan me sapan oh kadek.

²²Me KAUN-O kin ketin kupwuramwahwih, iei irail me pahn koukousoan nan sahpwo, a irail me rialahr pahn KAUN-O, pahn koakoahksang.

²³KAUN-O kin ketin kahluwa aramas akan nan ahl me re en weweid ie oh kin ketin sinsile irail kan me kin kaparanda kupwure.

²⁴Ma re pahn pwupwudi, re sohte pahn wonohnte nanpwel, pwe KAUN-O pahn ketin sewese kapwourirailda.

²⁵Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.

²⁶Ahnsou koaros e kin kadek oh mweidohng aramas nah mwohni pwe re en doadoahngki, oh nah seri kan wia kapai ehu ong ih.

²⁷Sohpeisang me suwed, oh wia me mwahu, eri kadaudokomw kan ahpw pahn koukousoan nan sahpwo kohkohlahte;

²⁸pwe KAUN-O kin kupwurperenki dahme pwung oh sohte kin likidmeliehla sapwellime aramas loalopwoat akan. E kin ketin sinsile irail ahnsou koaros, a kadaudok en me suwed akan pahn koakoahksang.

²⁹Me pwung kan pahn koukousoan nan sahpwo oh re pahn sapwenikihla kohkohlahte.

³⁰Koasoien aramas mwahu me diren loalokong, oh e kin lamalam pahrek ahnsou koaros.

³¹Kosonned en eh Koht kin poad nan eh mohngiong oh e sohte mwahn kin mweisang.

³²Aramas suwed kin mwasamwasahnte aramas mwahu kan oh kin song en kemeirailla;

³³a KAUN-O sohte pahn mweidalahng irail pahn manaman en ar imwintihti kan de ketin mweidohng re en pakadeikada nan mwoalen kopwung.

³⁴Koapworopworki KAUN-O oh kapwaiada sapwellime kosonned akan; e ahpw pahn ketin kawawihiukala ni eh pahn ketikihong uhk sahpwo, oh ke pahn kilang me suwed akan ar pahn koakoahksang.

³⁵I kilangadahr aramas suwed emen me inenen lemei, me sikdahsang aramas koaros, rasehng sidar en Lepanon pwoat,

³⁶a mwuhr, ni ei daulih wasao, e solahr mie; I ahpw rapahkiseli, oh sohte diar.

³⁷Tehk mwahu aramas mwahu, kilang aramas pwung; aramas meleilei kin mie kadaudoke,

³⁸a me dipan akan pahn mwomwla douluhl, oh kadaudokarail kan pahn kamwommwomwla.

³⁹KAUN-O kin ketin doarehla aramas pwung kan oh kin ketin apwalih irail ni ahnsou apwal.

⁴⁰E kin ketin sewese irail oh kapitirailla; e kin ketin doare irail sang rehn aramas suwed akan. pwehki ar kin sohpeiong pwe re en diar sileparail.