Read Pohnpeian Melkahka Kan 38 Bible Online

Melkahka Kan 38 - Pohnpeian bible

Melkahka Kan 38

¹Maing KAUN, komw dehr ketin kaloke ie nan omwi engieng!

²Komw ketin kauwehkinielahr sapwellimomwi arep kan; komw ketin keseiedier.

³I medengkilahr kowahlap omwi engieng pahi; paliwereiet unsek soumwahulahr pwehki dipei kan.

⁴I mwopwlahr nan ahd en dipei kan, dipei kan katoutouwihielahr, I solahr kak wahda.

⁵Pwehki ei pweipwei, kahrehda ei ohla kan kenspesengehr oh pwohsuwedlahr.

⁶I rihkosdiongehr nanpwel oh mwoatohtalahr; I kin nsensuwedki sang nimenseng lel nipwong.

⁷I mwasingkilahr karakar en nan kapehdiet oh kereniongehr I pahn mehla.

⁸I weikeklahr oh mwoatohtalahr; mohngiongiet mier nan apwal, oh I weiweirengki ei medek.

⁹Maing KAUN, komw mwahngih dahme I kin kasikasik; komw karonge ngilen ei weirek koaros.

¹⁰Mohngiongiet wie rerrer, solahr ei kehl, oh nan mesei kat ediedlahr.

¹¹Kompoakepahi oh mehn mpei kan solahr kin keidohng mpei, pwehki kens kan ni paliwereiet; pil ei peneinei kan sohte kin men karanih ie.

¹²Irail kan me men kemeiehla kin kaunopada arail mehn lidipih ie, oh irail kan me men kauweiehla, re kin kasalowehkin ie ar pahn kauweiehla; re sohte kin tokedihsang ar kin koasoakoasone re en uhwong ie.

¹³I rasehng aramas salengepon men me sohte kak rong wasa, rasehng aramas lohteng men me sohte kak lokaia.

¹⁴I rasehng aramas me sohte kin sapeng mehkot, pwehki eh sohte kak rong wasa.

¹⁵Ahpw, Maing KAUN, I kin likih komwi; oh komwi, Maing KAUN, ei Koht, me pahn ketin sapeng ie.

¹⁶Komw dehr ketin mweidohng ei imwintihti kan en pereperenki ei apwal; komw dehr ketin mweidohng irail en suweiki ei paisuwedlahret!

¹⁷I nektehn pwupwudi oh ei medek me poatopoat.

¹⁸I patohwan sakarkihda dipei kan; me kadirehkinielahr pwunod mwuledek.

¹⁹Ei imwintihti kan kehlail sang ie; me ngeder me kailongkin ie ni so kahrepe.

²⁰Irail kan me kin dupungki me suwed ei wiewia mwahu kin uhwong ie pwehki ei kin song kapwaiada dahme pwung.

²¹Maing KAUN, komw dehr ketin likidmelieiehla; Maing ei Koht, komw dehr ketin dohweisang ie!

²²Maing ei Kaun oh ei sounkomour, komw ketin sewese ie met!