Read Pohnpeian Melkahka Kan 4 Bible Online

Melkahka Kan 4 - Pohnpeian bible

Melkahka Kan 4

¹Maing Koht, soundoarepei, komw ketin sapeng ie ni ei kin kapakap. Ni ei milahr nan apwal, komwi me ketin seweseiehda. A met komw kupwurkalahngan oh karonge ei pekipeket.

²Kumwail aramas akan, ia erein amwail pahn mwamwahlikin ie? Ia erein amwail pahn kin kesempwalki soahng me sohte katepe kan oh idawehn soahng me likamw akan?

³Kumwail en tamataman me KAUN-O ketin piladahr en sapwellimanikihla me pwung kan, oh e ketin karonge ie ni ei kin likweriong.

⁴Kumwail masak oh rerrer oh tokedihsang amwail kin wia dihp; kumwail medemedewe mwahu duwen met, ni amwail kin wendi nennenewei nan amwail peht kan.

⁵Kumwail meirongkihong KAUN-O amwail mehn meirong pwung, oh likih ih.

⁶Mie me tohto me kin kapakap nin duwe met: “Maing KAUN, komw ketin kupwureiong kiht sapwellimomwi kapai kan. Komw ketin kalahngan kupwurei kiht!”

⁷Ahpw peren me komw ketikihongieier siksang mehlel peren me re pahn kin ahneki sang ni reken ar wahn pilawa oh wain akan.

⁸Ni ei kin wendi, I kin meirla ni popohl; pwe komwi, Maing KAUN, me kin ketin sinsile ie.