Read Pohnpeian Melkahka Kan 44 Bible Online

Melkahka Kan 44 - Pohnpeian bible

Melkahka Kan 44

¹Maing Koht, se patohwan rongkier pein salengat akan-% at pahpa kahlap ako me padahkihongkitehr duwen soahng kapwuriamwei ko me komw ketin wiadahr rehrail, ni mwehin kawao:

²duwen omwi pein ketin kasarehla me rotorot akan oh ketin koasoanehdi sapwellimomwi aramas akan nan sapwarail ko; duwen omwi ketin kaloke wehi teikan oh ketin kapaiamwahwihala sapwellimomwi wehi pilipilo.

³Sapwellimomwi aramas akan sohte kalowehkihdi sahpwo neirail kedlahs akan; re sohte powehdi ar imwintihti kan sang ni pein ar kehl; pwe sang ni roson oh manaman en nin limomwien, sang ni omwi kin ketin ieiang irail me kasalehda duwen omwi ketin poakohng irail.

⁴Komwi me ei nanmwarki oh ei Koht; komwi me ketikihong sapwellimomwi aramas akan manaman en powehdi,

⁵oh sang ni sapwellimomwi manaman se kin kalowehdi at imwintihti kan.

⁶I sohte likih me nei kesik ketieu de nei kedlahs pahn doareiehla;

⁷ahpw komwi me ketin doareikitasang at imwintihti kan oh ketin kalowehdi irail kan me kin kailongkin kiht.

⁸Se pahn kin kapinga komwi ahnsou koaros oh patohwan kapingkalahngan ong komwi kohkohlahte.

⁹Ahpw met komw ketin soingkitalahr oh mweidalahr pwe se en lohdi; komw solahr kin ketin ieiang at tungoal karis kan.

¹⁰Komwi me kupwurehda se en tangasang at imwintihti kan, oh re adihasang kiht at kepwe kan.

¹¹Komwi me ketin mweidohng pwe se en kamakamala rasehng sihmpwul kei; komwi me ketin kalipeikitalahng nan wehin liki kan.

¹²Komw ketin netikihla sapwellimomwi aramas akan ni pwei tikitik, duwehte mehkot me sohte kesempwal.

¹³Mehn mpat akan kilangehr dahme komw ketin wiahiong kiht, re ahpw kin kapailok oh kouruhrkin kiht.

¹⁴Komw ketin wiahkinkitala mehn kepit nanpwungen wehi kan; re kin tuhtuwelengki ar kouruhrkin kiht.

¹⁵I kin sansaro ahnsou koaros; I namenengkilahr kowahlap

¹⁶ei kin rongorong kepit oh lokaia kapweikeng sang ei imwintihti kan oh irail kan me kin kailongkin ie.

¹⁷Mepwukat koaros re wiahiong kiht, mehndahte ma se sohte manokeikomwihla de kauwehla inowo me komw ketin wiahiong kiht.

¹⁸Se sohte soaloalopwoat ong komwi; se sohte kauwehla sapwelliomwi kosonned akan.

¹⁹Komwi ahpw ketin keseikitala nanpwungen mahn lawalo kan; komw ketin keseikitala nan rotorot mosul.

²⁰Ma se patohwan tokedihsang at kaudokiong at Koht, oh kapakap ong emen koht en liki,

²¹komwi uhdahn pahn mwahngihada, pwe komw kin mwahngih at lamalam rir kan.

²²Ahpw pwehki komwi me se kin patohwan mehkihla ahnsou koaros, oh wiahkihla sihmpwul kei me kin pakahrlahng kamakamala.

²³Maing ei Kaun, komw ketin ohpala wasa! Dahme komw ketin seiseimwongki? Komw ketida! Komw dehr ketin soingkitala kohkohlahte!

²⁴Dahme komw ketin karirihkiweisang kiht silangmwien? Komw dehr ketin meliehla at tungoal lokolok oh apwal!

²⁵Se pwupwudiongehr nan pwehl; se lohdier oh wonohnehr nan pwelpar.

²⁶Komw ketido seweseikitada! Pwehki sapwellimomwi limpoak poatopoat me kamourkitala!