Read Pohnpeian Melkahka Kan 45 Bible Online

Melkahka Kan 45 - Pohnpeian bible

Melkahka Kan 45

¹Pato kaselel kei kipedier nan mohngiongiet, ni ei pahn wiahda ei koulen kaping ong nanmwarki. Loweiet pahn rasehng nein sounnting pinsel ni ei pahn koulki melkahka pwoatet.

²Komwi me keieu masamwahu nanpwungen ohl akan; sang ni doauasomwien mahsen lingan kin pwilipwilsang. Koht kin ketin kupwuramwahwih komwi ahnsou koaros.

³Nanmwarki roson, komw ketin kapwatahkinkomwihda sapwellimomwi kedlahs; komw meid diren roson oh lingan kowalahpie!

⁴Ni roson lapalap komw ketin wonowohng omwi lingan en powehdi, pwe komwi me kin wia soundoarepen me pwung oh mehlel! Omwi powehdi kowahlap pahn sang ni sapwellimomwi roson!

⁵Sapwellimomwi arep keng kan pahn lelete pwar mohngiong en sapwellimomwi imwintihti kan; wehi kan kin poaridi pahn aluweluwomwi kan.

⁶Wehio me Koht ketikihong komwi pahn kin poatopoat kohkohlahte. Komw kin ketin kakaun sapwellimomwi kan ni me pwung;

⁷komw kin ketin poakohng dahme pwung oh kin ketin kalahdeki me suwed. Ihme kahrehda Koht, omwi Koht, ketin pilkomwidahr oh ketin kapwildier pohmwi peren laudsang me e ketikihong nanmwarki teikan.

⁸Sapwellimomwi likou kan pwohmwahuki pwohn mir oh alos; sounkeseng kan kin kamwakamwait komwi nan tehnpas lingan akan me kapwatki aipori.

⁹Sapwellimen nanmwarki serepein kan me wia erirpen mwoalomwi, oh sapwellimomwi likendo me uh ni pali maun, kapwatki kohl kaselel.

¹⁰Maing likend en nanmwarki, komw karonge mahs dahme I pahn patohwan-% komw ketin meliehla sapwellimomwi kan oh kisehmwi kan.

¹¹Sapwellimomwi lingan me pahn kahrehiong nanmwarkio eh pahn inengieng komwi; ih me omwi kaun, komwi uhdahn pahn kin peikiong.

¹²Mehn Dair kan pahn patohwandohng komwi ar kisakis kan; me kepwehpwe kan pahn kin song en alkenkenla rehmwi.

¹³Sapwellimen nanmwarki serepeino patopato nan tehnpaso-ia uwen eh kaselel! Kohl me wia dereht en eh likou.

¹⁴Ni eh kapwatkihda soangen kapwat kaselel pwukat, eh ahpw pakahrlahng rehn nanmwarkio, ni kapar en erir, iangahki pwihn en meipwon akan; irail koaros pil pakahrlahng rehn nanmwarkio.

¹⁵Re ahpw nsenamwahu oh pereperen patohlong nan tehnpas en nanmwarki.

¹⁶Maing ei nanmwarki, komw pahn ketin sapwellimanikihla pwutak tohto me pahn wiliandi omwi pahpa kahlap ako nin duwen nanmwarki kei, oh komw pahn kasapwilirailda pwe re en kaunda sampah pwon.

¹⁷Ei koulet pahn kalaudehla kapingpen mwaromwi kohkohlahte, oh aramas koaros pahn pil kapinga komwi ni ahnsou kan me pahn kohdo.